Կարծում եմ՝ ցանկացած մարդ և երկրի ղեկավար իր վրիպակներն ըստ պատեհության ուղղում է և ԱՄն նախագահը դա արդեն իսկ արել է, այդ թվում՝ իր թվիթերյան վերջին գրառման մեջ, լրագրողների հետ զրույցում, անդրադառնալով Դոնալդ Թրամփի կողմից Հայաստանը որպես Ալբանիա ներկայացնելուն, ասաց վարչապետ Նիկոլ Փաշինյանը։
«Այսօր կառավարության նիստին ես էլ երկու հարգելի մարդկանց անուններ շփոթեցի, բայց դա չի նշանակում, որ ես չեմ տարբերում, թե ով՝ ով է։ Ինձ ասացին, որ ես Վիկ Դարչինյանի փոխարեն ասել եմ Նշան Մունչյան, բայց դա չի նշանակում, որ ես Վիկ Դարչինյանին Նշան Մունչյանից չեմ տարբերում»,-ասաց նա։
Ինչ վերաբերումէ հփաստին, որ ՄԻԵԴ-ը հրապարակել է Մարտի 1-ի գործով վճիռը, ըստ որի՝ ՀՀ իշխանությունները խախտել են զոհված քաղաքացիների կյանքի իրավունքը, Նիկոլ Փաշինյանը նկատեց՝ ՄԻԵԴ-ն արձանագրել է ակնհայտը։
«Ես նախկինում էլ ասել եմ՝ ըստ էության, Մարտի 1-ի գործը բացահայտված է, ու բացահայտման արդյունքներն այսօր քննվում են դատարանում»,- ասաց նա։
Փաշինյանը հույս հայտնեց, որ ՄԻԵԴ վճիռը նոր խթան ու նոր ազդակ կլինի ՀՀ իրավապահների համար, որ նրանք, ի վերջո, գտնեն արդյունավետ դատավարության ձևն ու ապահովեն, որ Մարտի 1-ի ոճրագործներից որևէ մեկն իրական պատասխանատվությունից չխուսափի։
«Ես կարծում եմ, որ ՄԻԵԴ վճիռը լեգիտիմ առիթ է, որ մի հատ էլ նայենք՝ լավ, ինչքա՞ն կարող է դատավարությունը շարունակվել լղոզված պատասխաններով»,- ասաց նա։
