2022-ի օգոստոսի 5-ին Աղավնոյից լուր ստացա, որ տեղում արդեն թալան կա։ Տեղի բնակիչներից մի կին նույնիսկ զանգահարեց, թե ինքը տեսել է, ինչպես են տարել գյուղի որոշ մալուխներ և այլ իրեր։ Հետո հրապարակում արեց նախկին պատգամավոր, հիմա Արցախի Սոցիալական հիմնադրամի տնօրեն Սոֆյա Հովսեփյանը՝ նշելով, թե կոնկրետ ինչ են թալանել Աղավնոյից՝ մալուխներ, դվիժոկ և այլն։ Զանգահարեցի գյուղապետ Անդրանիկ Չավուշյանին։ Հաստատեց։ Տես՝ նկար 1
Հրապարակում արեցի այդ մասին՝ միայն ամոթանք տալով թալանչիներին ու ոստիկանության ուշադրությունը հրավիրելով այդ իրողության վրա։ Տես նկար 2
Օգոստոսի 6-ին շտապեց հերքող հրապարակում անել Արցախի ԱԺ պատգամավոր Կարեն Հովհաննիսյանը՝ ինձ ստախոս անվանելով ու համոզելով, թե Աղավնոյում ոչ մի թալան չկա։ Վիտալի Բալասանյանի կուսակից պատգամավորի գրառումը տես նկար 3։
Օգոստոսի 6-ին Արցախպրեսս լրատվական կայքը, ամենայն հավանականությամբ, վերևից իջեցված առաջարկ/խնդրանքով մի հրապարակում արեց՝ հերքելով իմ հրապարակումը Աղավնոյի թալանի մասին։ Նույնիսկ Արցախի ոստիկանությունը մեկնաբանեց, թե թալանի մասին տեղեկությունը չի համապատասխանում իրականությանը։ Տես նկար 4։
Օգոստոսի 6-ի երեկոյան ես Աղավնոյում էի։ Զանգեցի գյուղապետ Անդրանիկին, ասաց, պաշտոնյաներ կան գյուղապետարանում, որոնք ինձ ստախոս են անվանում։ Մինչև ես հասա գյուղապետարան՝ դեմ առ դեմ խոսելու այդ պաշտոնյաների հետ, նրանք արդեն հեռացել էին։ Այդ ընթացքը մոտ 5 րոպե էր։ Անդրանիկն ասաց՝ իրենից պահանջում են, որ ես՝ Նաիրի Հոխիկյանս, հերքեմ իմ հայտարարությունները։ Անդրանիկն ասել է, որ նման հարցով ինձ չի դիմի, քանի որ օրեր անց կապացուցվի ինչպես իր, այնպես էլ իմ ասածը։
Հաջորդ օրերին Արցախում որոշ պաշտոնյաների կողմից շարունակվեց իմ դեմ հերյուրանքը, թե իբր թալանի մասին իմ զգուշացումները կեղծիք են, և Բերձորն ու Աղավնոն պատշաճ կերպով պահպանվում են։ Եվ դա այն դեպքում, երբ ինքս տեսնում էի սեփական աչքով թալանի մասշտաբները, նույնը տեսնում էին նաև տեղի բնակիչները, որոնց արգելվում էր որևէ ավելորդ բան վերցնել բնակավայրից։
Օգոստոսի 23-ին Արցախի Տարածքային կառավարման նախարար Հայկ Խանումյանը պաշտոնական հայտարարություն է արել, որից մեջբերում եմ հետ հետևյալը․ «Բերձորում թալանվել էր տրանսֆորմատորների յուղը: Բերձորում բռնկված հրդեհը լուրջ սպառնալիքներ է ստեղծել ՀՀ-ից Արցախ եկող բարձավոլտ էլեկտրագծի համար: Աղավնոյի հատվածում թալանվել է օպտիկամանրաթելային մալուխը, ինչի պատճառով որոշ ժամանակ Արցախն առանց ինտերնետի էր: Մետաղի ջարդոն գողացողների կողմից թալանվել, ոչնչացվել էին կապի աշտարակները»: Տես նկար 5։
Ստացվում է, այն, ինչ ես օրեր առաջ ասում էի, ու ոստիկանությունը, պետական լրատվամիջոցը, պատգամավորը ջանասիրաբար հերքում ու ինձ ստախոս էին անվանում, հիմա նույն թալանի մասին փաստը հաստատում է Արցախի բարձր պաշտոնյան՝ նախարարը։ Ո՞վ է ստում՝ նախարա՞րը, թե պատգամավորը։
Հիմա արդյո՞ք այնքան բարոյականություն ու տղամարդկություն կունենան ինձ վարկաբեկող պաշտոնյաները, որ առնվազն ներողություն խնդրեն իրենց հիմար խոսքերի համար, թե՞ կմնան նույնքան անբարո ու տմարդի։
Ինչ որ անում եմ, Արցախի ամրության համար եմ անում, իսկ չինովնիկները մնում են չինովնիկ։ Հայհոյում են, վարկաբեկում ու բորենու նման ծիծաղում, բայց հետո երբ ապացուցվում է իրենց սնանկությունը, մոռանում են ամեն ինչ ու շարունակում չինովնիկին հատուկ մյուս գործերը։ Ազնիվ մարդիկ, սակայն, ոչինչ չեն մոռանում։ Աստված ևս ոչինչ աչքաթող չի անում ու ոչինչ չի մոռանում։ Արցախը այդպիսի անհայրենիք չինովնիկներին չի, Արցախը հայինն է, ով ապրել ու կշարունակի ապրել Արցախում՝ թալանված, հոշոտված, բայց կանգուն Արցախում։
