Այո՛, իմ ցուցումով է եղել. ես խնդրել եմ, որ նա հրաժարականի դիմում գրի։ Այս մասին, այսօր լրագրողների հետ ճեպազրույցի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով Ցեղասպանության թանգարան ինստիտուտի տնօրեն Էդիտա Գզոյանի ներկայացրած հրաժարականի դիմումին։
«Ես դա համարել եմ կառավարության վարած արտաքին քաղաքականությանը հակառակ գործողություն, ես դա համարել եմ սադրիչ գործողություն և խնդրել եմ, որ դիմում գրի»,- ասաց Փաշինյանը։
Նա շեշտեց՝ երբ երկրի վարչապետը ասում է, որ Ղարաբաղյան շարժումը պետք է դադարեցնել, չի կարող լինել պաշտոնյա, որը կշարունակի այդ մասին խոսել։
«Երբ երկրի վարչապետն ասում է, որ Ղարաբաղյան շարժում չկա, օտարերկրյա հյուրին «Արցախյան հիմնահարց» թեմայով գիրք նվիրելն ի՞նչ է նշանակում։ Էս երկրում քանի՞ հոգի կարա արտաքին քաղաքականություն վարի։
ՀՀ-ում արտաքին քաղաքականություն վարում է ՀՀ կառվարությունը և այն պետական պաշտոնյան, և ով այդ քաղաքականությանը հակասող բան կասի, պետք է ազատվի աշխատանքից։
Մենք պետությո՞ւն ենք, թե՞ սա ինքնագործ խմբակ է։ Սա պետություն է՝ հստակ կառավարման տրամաբանությամբ։ Այստեղ չքմեղանալու հարց չկա»,- ասաց Փաշինյանը։
Ճշտող հարցին՝ այսինքն՝ թանգարանի տնօրենը հեռացվել է այն բանի համար, որ ԱՄՆ փոխնախագահին Արցախի վերաբերյալ գի՞րք է նվիրել, Փաշինյանը դրական պատասխան հնչեցրեց։
«Ես էն օրը գնացել եմ պատարագի, այնտեղ ոչ մեկ անգամ հնչում է Արցախի Հանրապետություն։ Դա ի՞նչ է նշանակում. նշանակում է պատերազմի կոչ՝ եթե ոչ այսօր, ուրեմն վաղը-մյուս օրը։ Բա դրա համար ենք ասում , որ Կտրիճ Ներսիսյանը և իր խմբակը պատերազմի կուսակցության առաջնորդությունն են ստանձնել։ Պետք է չլինի նման բան«- նշեց Փաշինյանը։
Հիշեցնենք՝ օրերս «Հրապարակը» գրել էր, որ Էդիտա Գզոյանին ԿԳՄՍ նախարար Ժաննա Անդրեասյանն առաջարկել է աշխատանքից ազատման դիմում գրել. «Սպառնացել է՝ եթե ինքնակամ չգրի, իրենք կազատեն աշխատանքից։
