Պն նախկին շենքում ժամանակավորապես բնակվող քաղաքացիները բողոքի ակցիա են իրականացրել ՊԵԿ-ի դիմաց։
Ինչպես հայտնի է, նախարարության շենքը ՊԵԿ-ի հաշվեկշռում է։ Ոստիկանները, ՊԵԿ-ի գրության հիման վրա, փետրվարի 16-ին բնակիչներին հեռացրել են շենքից՝ թույլ չտալով նրանց այլևս վերադառնալ նախկին կացարաններ։
շենքում բնակվել է 127 ընտանիք, որոնց մեջ կան արցախյան պատերազմենրի մասնակիցներ, Արցախից տեղահանվածներ։ Նրանց մի մասն այս օրերին ապրել է ՊՆ նախկին շենքի հարևանությամբ տեղադրված վրանում։
«Մարդկանց տարհանելու ձևեր էլ կան, առավոտ շուտ եկել են, մեր դրած դռները կոտրել են, մարդկանց հանել են դուրս, ապացույցներ էլ կան, որ լիքը բաներ են կորել։
Ներկա պահին քննարկում չի եղել, թե կարող ենք վերադառնալ մեր բնակարաններ, բայց մեր պահանջը նույնն է, որ վերադառնանք։ Ես ապրելու եմ իմ բնակարանում, սա է իմ տեսած լուծումը»,- ՊԵԿ-ի դիմաց բողոքի ակցիայի ժամանակ ասաց ՊՆ նախկին շենքի բնակիչը:
Ցուցարարներին աջակցելու եկած ՀՀ նախկին ՄԻՊ Լարիսա Ալավերդյանը հարցի լուծումներ է առաջարկում՝ թույլ տալ դրսում հայտնված մարդկանց բնակվել ՊՆ նախկին շենքում, մինչև նրանց կեցության հարցերը լուծվեն։
Ի վերջո, նրանց դրսում թողնելով, բռնի ուժով հանելով բնակարաններից՝ խախտվում են այդ մարդկանց իրավունքները։ Նրանք ուրիշի տուն չեն մտել ու զավթել այն, այլ գլխներին տանիք չունենալու պատճառով ստիպված են եղել իրենց ընտանիքները տեղավորել մի շենքում, որը տարիներ շարունակ չի օգտագործվել ու լքված շինություն է հիշեցրել։
Լարիսա Ալավերդյանն առաջարկում է ուսումնասիրել բոլոր 127 ընտանիքների կարգավիճակը, խնդիրները, փոխկապակցված աշխատել տեղական ինքնակառավարման մարմինների, Աշխատանքի և սոցիալական հարցերի նախարարության, քաղաքացիական իրավունքի պաշտպանության կառույցների հետ։
«Այս մարդիկ ՀՀ քաղաքացիներ են, անթույլատրելի է առաջ քաշել նրանց՝ ՊՆ շենքից հանելու որոշումն ու 127 ընտանիքի հանձնել բախտի քմհաճույքին»,- ասաց Լարիսա Ալավերդյանը։
