ՀՀ ազգային ժողովում 2024 պետական բյուջեի կատարման մասին տարեկան հաշվետվության քննարկման ընթացքում Քպ վարչախմբի ղեկավարը հայտարարել է, որ եթե, օրինակ, պետական ծառայողները մի ամիս աշխատավարձ, պարգևավճարներ չստանան, ապա տարեցների թոշակները հնարավոր կլինի բարձրացնել ընդամենը 1400 դրամով։ Այսօր հարցազրույցի ընթացքում անդրադարձել եմ այդ աղաղակող ստին և նշել, որ դա կատարվում է հանրության տարբեր շերտերի միջև պառակտում սերմանելու նպատակով։ Իմ դիրքորոշումը հիմնված է թվային տվյալների վրա, մասնավորապես հիմք վերցնենք երեք տվյալ։
1. ՀՀ պետական ծառայողների թիվը, որը հիմա կազմում է 220.000 մարդ
2. ՀՀ պետական ծառայողների միջին ամսական աշխատավարձը, որը 213.000 դրամ է։
3 Փաստացի պետական ծառայողների ամսական աշխատավարձի ֆոնդը կազմում է 46 մլրդ 860 մլն դրամ։
Եթե այս գումարը բաժանում ենք թոշակառուների առկա թվաքանակի վրա, որը 498.000 է, ապա ստացվում է, որ յուրաքանչյուր թոշակառուին բաժին կհասներ 94.000 ՀՀ դրամ։
Մարդ ի՞նչ կարգի «գրագետ» պետք է լինի, որ գումարում, բազմապատկում չկարողանա կատարել և 94. 000-ի փոխարեն ստանա 1400 դրամ։
Սա կատակ չէ, սա սարկազմ կամ կրկեսային ներկայացում չէ։ Սա հայտարարել է երկրի առաջին պաշտոնյան, և չգտնվեց մեկը ԱԺ կոչված «տերթոդիկյան դպրոցում», որը խաբեբային ցույց կտար նրա ոչ պատահական սխալը։
Ի՞նչ հետեւություն այս ամենից:
1. վարչախմբի ղեկավարի արտաբերած ոչ մի թվային տվյալ հավաստի չէ
2. վարչախմբի ղեկավարը չի կարող որևէ մեկին կրթել
3. բյուջեի կատարողականի քննարկմանը մասնակցածներից ոչ ոք գրագետ չէ բառի բուն իմաստով։
Հրայր Կամենդատյան, տնտեսագետ, «Հայաքվե» ազգային միավորման վարչության անդամ
