Մեր վիճակն օրհասական է։ Եթե ընտրվում է այսօրվա իշխանությունը, եթե Նիկոլ Փաշինյանը վերարտադրվում է, ապա Հայաստանի կյանքը կարճ է, Տավուշի մարզի Շամախյան համայնքում բնակիչների հետ այսօրվա հանդիպման ժամանակ ասաց «Միասնության թևեր» կուսակցության կառավարման խորհրդի անդամ Դավիթ Անանյանը։
«Որովհետև 300 հազար ադրբեջանցիների «վերաբնակեցման», «Արևմտյան Ադրբեջանի» հայեցակարգը հստակ իրականացվելու է։ Էն անասուն պահող թուրքերը չեն գալու, կանաչի ծախող թուրքերը չեն գալու, քիրվաները չեն գալու. գալու են այն թուրքերը, որոնք հատուկ պատրաստված են լինելու, գալու են իրենց համայնքներով, իրենց պետական ծրագրերով։ Դա նշանակում է, որ մենք մեր ազգային գաղափարախոսությունը չպիտի ունենանք։ Դրա համար եմ ասում՝ հունիսի 7-ը կա՛մ վերջակետն է, կա՛մ ինչ-որ բանի սկզբնակետ»,- ասաց Դավիթ Անանյանը։
Նա վստահություն հայտնեց՝ իրենց քաղաքական ուժի կողմից առաջադրված վարչապետի թեկնածու Արման Թաթոյանը պատմական այս պահի ամենահարմար թեկնածուն է։
«Նա այն թեկնածուն է, որ կարող է համախմբել պրոֆեսիոնալներին, ազգային գործչներին, այն մարդկանց, որոնք սեփական շահը ստորադասում են ազգային-պետական շահին»,- ասաց Դավիթ Անանյանը։
