Արցախի մայրաքաղաք Ստեփանակերտում հավաքված քաղաքացիները ցանկանում են հանդիպել Արցախի նախագահ Արայիկ Հարությունյանի հետ, որպեսզի նրանից պահանջեն իր հստակ դիրքորոշումը Պրահայի քառակողմ հանդիպման հայտարարության եւ Ադրբեջանի նախագահ Իլհամ Ալիեւի հայտարարությունների վերաբերյալ:
«Մենք Արայիկ Հարությունյանից ոչ մի դրական ակնկալիք չունենք 2020 թվականից առայսօր, որովհետեւ նա Նիկոլ Փաշինյանի կամակատարն է Արցախում: Բայց միեւնույն է, ինքը պետք է խոսի ժողովրդի հետ, ասի՝ Ադրբեջանը ցանկանում է խուճապ տարածել, թե իրոք, իրականություն է: Երկու դեպքում էլ համարձակություն եւ տղամարդկություն է պետք, որոնք կարծում եմ՝ Արայիկ Հարությունյանը չունի: Մենք մեր մասին առավել շատ բան իմանում ենք Ադրբեջանի իշխանությունից, քան մեր սեփական, կարծես իրենք չեն Արցախի ղեկավարությունը, կարծես օտար երկրի մասին է ամեն ինչ»,- NEWS.am-ի հետ զրույցում ասաց ակցիայի մասնակից Մարատ Ստեփանյանը:
Ակիցայի մասնակիցը նկատեց, որ նման ակցիաների դեպքում, ինչպես եւ այսօր է, ակցիայի մասնակիցների հետ հանդիպման է գալիս ԱԺ նախագահ Արթուր Թովմասյանը:
Ակցիայի մեկ այլ մասնակից՝ Վահե Հարությունյանը նշում է՝ Արայիկ Հարությունյանը, ի վերջո, պետք է ասի՝ ինքն իրո՞ք տեղյակ է բանակցային գործընթացի ամբողջ մանրամասներից, ինչպես իր վերջին հարցազրույցում հայտարարեց վարչապետ Փաշինյանը, թե՝ ոչ:
«Ճիշտ է՝ վերջերս տեսաուղերձ հղեց Արայիկ Հարությունյանը, սակայն, ըստ էության, այդտեղ չկար մեր հարցերի պատասխանները: Մենք ուզում ենք իմանալ՝ որտեղ է մեզ գլորում Հայաստանի իշխանությունը, ինչ է սպասվում մեզ: Տարածքային ամբողջականության ճանաչումն առանց Արցախի մասին խոսելու հենց նշանակում է, որ Արցախը ճանաչում ենք այդ տարածքային ամբողջականության մեջ: Այլ անուն որեւէ տեսանկյունից չենք կարող տալ: Վտանգի տակ է Արցախում գտնվող յուրաքանչյուր քաղաքացու կյանք՝ մինչդեռ մենք ուղղակի ուզում ենք խաղաղ ապրել, ինչպես յուրաքանչյուր սովորական մարդ երկրագնդի վրա»,- նշեց նա:
