Հայաստանի առաջին հանրապետության անկախության 104-րդ տարեդարձի առթիվ Ավստրալիայի մայրաքաղաք Կանբերայի «Telstra» հեռուստաաշտարակը լուսավորվել է Հայաստանի Հանրապետության դրոշի գույներով։ Տեղեկությունը հայտնում է Ավստրալիայի Հայ դատի հանձնախումբը։
Ըստ հաղորդագրության` հեռուստաաշտարակը 6 ժամ շարունակ` 17:00-ից մինչև 23:00-ն, եռագույն է եղել։
Ավստրալիայի Հայ դատի հանձնախմբի քաղաքական հարցերի տնօրեն Միքայել Քոլոքոսյանը աշտարակի աշխատակիցներին շնորհակալություն է հայտնել հայաստանյան պետական տոնի առթիվ ավստրալիահայ համայնքին միանալու համար:
«Սա առաջին դեպքն է, երբ Հայաստանի համար կարևոր ամսաթվի կապակցությամբ Ավստրալիայի տեսարժան վայրերից մեկը լուսավորվում է հայկական դրոշի գույներով»,– ասված է հաղորդագրության մեջ։
