Վերջին օրերին հետեւում եմ Գյումրի քաղաքի ընտրական ելույթներին։ Գոնե ինձ համար պարզել եմ, որ քաղաքացիներին հստակ խաբում են։ Մասնավորապես Քպ-ի կողմից ժպ նշանակված թեկնածուն հանդիպումների ժամանակ պնդում է, որ Գյումրին դարձնելու է գերժամանակակից քաղաք, վերացնելու է տնակային ավանները, բնակարաններ է հանձնելու քաղաքացիներին։
Դուք կատակո՞ւմ եք:
Ընդամենը ցանկանում եմ հիշեցնել, որ Գյումրին ծաղկեցնելու համար կա միայն երեք ֆինանսական աղբյու, որոնցից և ոչ մեկը գոյություն չունի, հասանելի չէ։
1. Թեկնածուի անհատական ֆինանսական միջոցները, որոնք քաղաքաշինական տեկտոնական փոփոխությունների հնարավորություն կտան։
2. Դրսից կատարվող ներդրումները, որոնց տեղաբաշխման համար քաղաքում չկան ինովացիոն հետաքրքիր ձեռնարկություններ, ուստի ոչ մի ներդրող մի քոռ կոպեկ չի բերելու քաղաք և քաղաքի տնտեսություն։
3. ՀՀ պետական բյուջեի հնարավոր աջակցություններ դոտացիոն սկզբունքով, քանի որ ՀՀ 2025 թվականի պետական բյուջեն արդեն իսկ 600 մլրդ դրամի դեֆիցիտ ունի, և պետական բյուջեի մասին օրենքով նախատեսված չեն նման ֆինանսական հոսքեր դեպի Գյումրի։ Եթե քպ-կան պաշտոնյաները գալիս են շոուների և բուկլետախեղդ են անում քաղաքացիներին, դեռ չի նշանակում, որ նրանք փող են տալու քաղաքին։
Հարգելի գյումրեցիներ, հիշեք, որ մոտակա վեց տարիներին ՀՀ խնդիր ունի՝ ահռելի պետական պարտք և տոկոսներ սպասարկելու, և ոչ մի քաղաքաշինական մեգանախագիծ չի արվելու։ Այն թեկնածուն, որը կփորձի ձեզ համոզել, խոստանալ դա, նա խաբեբա է։
Բուկլետախեղդ անելը, ձեռքով ընտրողի զարկերակը ստուգելը, «մեր ու ձեր» կոչվելը դեռ չի նշանակում տնտեսություն, ավելացված արժեք, քաղաքային արտադրական մշակույթ, պրոֆիցիտով քաղաքային բյուջե։
Նախընտրական հանդիպումների ընթացքում բոլոր թեկնածուներից պահանջեք. թող բացատրեն, թե ինչպիսի ֆինանսական դոնորներ են գտել, ինչպիսի ձեռնարկության մեջ են փող ներդնելու, ինչպիսի ճյուղային ենթակառուցվածքներ են գործարկվելու, թողարկվելո՞ւ են արդյոք քաղաքային պարտատոմսեր … և էլի բազմաթիվ լակմուսային հարցեր։
Հարցերի պատասխանները լսելուց հետո միայն հանգիստ խղճով գնացեք ընտրատեղամասեր։
Հրայր Կամենդատյան, տնտեսագետ, «Հայքվե» ազգային քաղաքացիական միավորման ներկյացուցիչ
Հետևեք մեզ նաև Տելեգրամում։
