Պաշտպանության նախարարության շենքի մուտքի մոտ դրությունը լարված է մնում։ 44-օրյա պատերազմում անհայտ կորած զինվորների՝ բողոքի ակցիա իրականացնող ծնողներն ուժով փակել են ՊՆ-ի դարպասները և թույլ չեն տալիս, որ որևէ աշխատակից դուրս գա շենքից։
«Չի բացվելու էս դուռը։ Գնա երեխուս բեր, բացենք»,-ասաց ծնողներից մեկը։
Նշենք, որ տեղում են ոստիկանական ուժեր։
«Մեկդ ինձ կպավ, չգիտեմ՝ ինչ կանեմ։ Դուք ասեք, որ չենք կարողանում բացել դռները, թող իրենք իջնեն բացեն։ Թող գան, պատասխան տան, թե ինչի է էսօր սենց ստացվել»,–ասաց ծնողներից մեկը՝ տեսնելով ոստիկաններին։
Անհետ կորած զինծառայողի մայրն էլ նշեց՝ «թույլիկ մորքուրները ոնց պատերազմից են փախել, հիմա էլ ծնողներից են փախչում»։
«Խույս են տալիս: Իրենք փալաս են, երբեք իրենց խոսքի տերը չեն եղել, բանը հասել է սրան, որ ծնողների զայրութը նորից շարժեցին, ինչպես միշտ ծնողը միշտ խաբված է։ Մենք Արման Սարգսյանի հետ չենք էլ ուզել հանդիպել»,- ասաց նա։
Նշենք, որ բողոքի ակցիա իրականացնող հարազատներից մեկի՝ անհետ կորած Սարգիս Ղուկասյանի հորեղբայր Արսեն Ղուկասյանի ինքնազգացողությունը վատացավ։ Նրա համար շտապօգնություն կանչեցին, որը տեղում բուժօգնություն ցուցաբերեց։ Անհետ կորած զինծառայողի հայրը հրաժարվեց, որ իրեն հիվանդանոց տեղափոխեն։
Ոստիկանները փորձեցին ազատել ՊՆ–ի մուտքի հատվածը, քաշքշոց սկսվեց նրանց և ծնողների միջև, սակայն ծնողները տեղի չտվեցին։
Հիշեցնենք, որ անհետ կորած զինծառայողների ծնողները պահանջում են հանդիպում ԶՈՒ գլխավոր շտաբի պետ Էդուարդ Ասրյանի և Արցախի պաշտպանության բանակի նախկին հրամանատար Կամո Վարդանյանի հետ։
Սեպտեմբերի 27–ին նրանց խոստացել էին, որ այսօր հանդիպում կկայանա։
