Այսօր չկա որևէ քաղաքական ուժ՝ ներառյալ իշխող «Քաղաքացիական պայմանագիրը», որն ի վիճակի լինի միայնակ մեծամասնություն կազմել խորհրդարանում, լրագրողների հետ զրույցում այսօր համոզմունք հայտնեց ԱԺ «Հայաստան» խմբակցության պատգամավոր Գառնիկ Դանիելյանը։
Պատասխանելով այն հարցին, թե ինչու է ինքը զբաղեցնում ցուցակի համեմատաբար «հեռու»՝ 14-րդ հորիզոնականը, պատգամավորը հավաստիացրեց՝ իր համար տեղը կամ նույնիսկ խորհրդարանում ներկայացված լինելն էական չեն, իր համար այդ տեղում հայտնվելն անակնկալ չի եղել։
«Մեր թիմում տեղի համար մրցակցություն չկա։ Ինձ համար նշանակություն չունի՝ ես ցուցակի որ տեղում կլինեմ, ցուցակում կլինեմ, թե չեմ լինի։ Իմ պայքարը ո՛չ մանդատի համար է, ո՛չ էլ պատգամավոր դառնալու, ո՛չ էլ առիթ եմ տվել մտածելու, որ ես պատգամավոր դառնալու անհագուրդ ցանկություն ունեմ», – ասաց Գառնիկ Դանիելյանը։
Ընդդիմադիր խորհրդարանականը նաև նշեց՝ իրենց քաղաքական ուժը պատրաստ է համագործակցել բոլորի հետ՝ բացի գործող իշխանություններից։
«Մենք բաց ենք համագործակցության համար։ Բոլոր ընդդիմադիր ուժերը պետք է հստակեցնեն իրենց անելիքը. եթե չկա միասնական համագործակցություն, ապա ո՞րն է իրենց օրակարգը։
Անկեղծ ասեմ՝ այս պահի դրությամբ որևէ մեկին 50+ տոկոս չեմ տեսնում՝ և՛ ՔՊ-ին, և՛ ընդդիմությանը։ Բայց կարծում եմ՝ հավաքական ընդդիմությունը հնարավորություն ունի՝ ճիշտ աշխատանքի դեպքում իշխանությունից հեռացնելու Նիկոլ Փաշինյանին ասաց Դանիելյանը՝ հավելելով, որ կոնսոլիդացիան պետք է տեղի ունենա ամենաշատ ձայներ ստացած ընդդիմադիր ուժի շուրջ։
Պատասխանելով դիտարկմանը, թե որքանով է ժողովրդավարական ցուցակի անցողիկ տեղերում հայր և որդի Քոչարյանների ներկայությունը, Գառնիկ Դանիելյանը շեշտեց՝ դա միանգամայն համահունչ է համաշխարհային փորձին՝ Կաչինսկի եղբայրները՝ Լեհաստանում, ԱՄՆ-ում ևս նման փորձ եղել է։
«Լևոն Քոչարյանը թիմի անդամ է, գործող պատգամավոր է։ Որևէ խնդիր չեմ տեսնում. դա թիմային որոշում է»,- ասաց նա։
Վերջում պատգամավորը չցանկացավ կանխատեսումներ անել իր քաղաքական ուժի ստանալիք քվեների վերաբերյալ՝ նշելով, որ մեծամտությունը մեղք է։
