Մեկ ժամից ավելի է իրավապահ մարմինները՝ ԱԱԾ-ն, քննչական կոմիտեն, ոստիկանությունը գրոհել են, զավթել են Գյումրու համայնքապետարանը։ Այս մասին ֆեյսբուքյան ուղիղ եթերում անմիջապես Գյումրու քաղաքապետարանից հայտնեց ԱԺ «Հայաստան» խմբակցության պատգամավոր Մհեր Մելքոնյանը։
Նա նշեց, որ Գյումրու համայնքապետ Վարդան Ղուկասյանն ու մի քանի աշխատակիցներ մեկուսացվել են։
«Ես փորձեցի հանդիպել նրանց հետ, բայց քննչական խմբի ղեկավարն ու ԱԱԾ դիմակավորված աշխատողները ցույց չտեցին տեսակցել քաղաքապետին։
Ականատես ենք իրավական բեսպրեդելի, ապազգային ռեժիմը ցանկացած գնով փորձում է մեկուսացնել այն քաղաքական գործիչներին, համայնքների ղեկավարներին, ովքեր դեմ են այս ռեժիմին, մինչև վերջ կռիվ են տալիս, որ Հայաստանը չգնա թուրքացման։ Այո՛, այս ռեժիմը Հայաստանին տանում է թուրքացման»,- ասաց Մելքոնյանը։
Հիշեցնենք, որ ԱԱԾ աշխատակիցներն այսօր վաղ առավոտյան մտնել են Գյումրիի քաղաքապետարան։ Դիմակավորված հատուկջոկատայինները արգելել են աշխատակիցների ելքնումուտքը։ Տեղում նաև մեծաքանական ոստիկանական ուժեր են կենտրոնացված։
Հակակոռուպցիոն կոմիտեից հայտնել են , որ քննվող վարույթի շրջանակներում Գյումրիի համայնքապետարանում իրականացվում են քննչական գործողություններ:
Ավելի ուշ նույն մարմինը պաշտոնական հաղորդագրություն է տարածել, որ Գյումրի համայնքի մի խումբ պաշտոնատար անձանց կողմից խոշոր չափերով կաշառք ստանալու, վերջիններիս կաշառք տալու մեղադրանքներով ձերբակալվել է 8 անձ:
