Բոլոր պաշտոնյաների հայտարարգրերը հրապարակվում են ամեն տարվա ամռան ամիսներին։ Կտեսնեք, ոչ մի գաղտնիք չկա, հանգիստ եղեք, այսօլրագրողների հետ ճեպազրույցում հայտարարեց ԱԺ փոխնախագահ Ռուբեն Ռուբինյանը՝ անդրադառնալով ԱԺ աշխատակիցների նոր պարգևատրումների թեմային։
«Թափանցիկության պակաս լինում է այն դեպքում, երբ ինչ-որ բան չի հրապարակվում։ Ամեն ինչ կհրապարակվի»,- ասաց նա։
Այդ ընթացքում միջանցքում գտնվող ԱԺ նախագահ Ալեն Սիմոնյանը լրացրեց վերջինիս՝ հայտարարելով.
«Պարո՛ն Ռուբինյան, ասեք, որ մոտավորապես մեկ աշխատավարձի չափով է եղել։ Բայց կարող են բոլոր 700 աշխատակիցների ստացածը գումարել իրար և ասեն, որ դա աստղաբաշխական է, իսկ եթե դոլարի վերածեն, ավելի հետաքրքիր ու լավ ռեպորտաժ կստացվի»։
Հարցին՝ ընտրությունների նախօրյակին պետական ծառայողներին «գնահատելու» այս մեխանիզմն արդյոք չի խոսում իշխանությունների ունեցած որոշակի ակնկալիքների մասին, Ռուբեն Ռուբինյանն պատասխանեց.
«Ո՛չ, որովհետև որովհետև ընտրության նախօրյակին չի վարձատրության նոր մեխանիզմը ներդրվել։ Այն ներդրվել է ամիսներ առաջ։ Նոյեմբերը ընտրության նախօրյա՞կ է։ Կան նաև «հակակոռուպցիոն փորձագետներ», որոնք ասում են, որ թոշակ բարձրացնելը նախընտրական կաշառք է։ Կներեք, բայց ես չեմ պատրաստվում մեկնաբանել աբսուրդը»։
Անդրադառնալով ՀՀ երկրորդ նախագահ Ռոբերտ Քոչարյանի՝ իր փոդքասթում պարգևավճարների թեմային կատարած անդրադարձին, ԱԺ փոխնախագահը նկատեց՝ ինքը կարծում է, որ «Ռոբերտ Քոչարյանը և իր ընտանիքը պետք է դադարեն երկարացնել և պետք է առանց վիճարկելու 200 միլիոն դոլարը մուծվեն Հայաստանի Հանրապետության պետական բյուջե»։
«Թող իրենք դադարեն զբաղեցնել մեր դատավորներին, դատախազներին, փաստաբաններին և այսպես շարունակ։ Դատախազությունն իրենցից պահանջում է բյուջե վերադարձնել ապօրինի ձեռք բերված 200 միլիոն դոլարը. թող առանց երկարացնելու բերեն, մուծվեն բյուջե։ Դա տարբեր հաշվարկներով մի քանի հազար տարվա պարգևավճար կլինի»,- ասաց Ռուբինյանը։
