«Երկար կորոնավիրուսը» հիվանդների մոտ կարող է մնալ վեցից ինը ամիս կամ ավելի: Մասնավորապես, կարող են նկատվել նյարդաբանական բնույթի ախտանիշներ, սրտանոթային համակարգի դրսևորումներ և այլն, հայտնել է ՌԴ առողջապահության նախարար Միխայիլ Մուրաշկոն:
«Հիվանդների մոտ նկատվում են նյարդաբանական, ներառյալ կոգնիտիվ խանգարումներ, հիշողության խնդիրներ, հոգնածության բարձրացում, սրտանոթային համակարգի, շնչառական համակարգի, հենաշարժական համակարգի հետ կապվսծ տարբեր դրսևորումներ», – նրա խոսքերը հայտնում է ՏԱՍՍ-ը:
Аргументы и факты-ն գրում է, որ ըստ մի շարք հետազոտությունների՝ հիվանդության ախտանիշները տևել են ավելի քան 4 շաբաթ գիտափորձին մասնակցած մարդկանց 13,3%-ի մոտ, ավելի քան 8 շաբաթ՝ 4,5%-ի դեպքում, այսինքն՝ յուրաքանչյուր քսաներորդի, իսկ 2,3%-ը տառապել է ավելի քան 12 շաբաթ տևող ընթացքից:
Իտալացի գիտնականները պարզել են, որ հոսպիտալացված հիվանդների միայն 12,6%-ը ապաքինումից հետո մի քանի ամսվա ընթացքում վատառողջության որևէ ախտանիշ չի նկատում: Մնացածը շարունակում են զգալ այս կամ այն տեսակի անհարմարություն:
