Հուսով ենք, որ ԱՄՆ նոր վարչակազմը կփոխի իր անարդար վերաբերմունքը Վրաստանի նկատմամբ, և Թրամփի գալուստը կանդրադառնա ԵՄ-Վրաստան հարաբերությունների վրա. ֆրանսիական ռադիոյին տված հարցազրույցում հայտարարել է Վրաստանի նախագահ Միխեիլ Կավելաշվիլին։
«Վրաստանի վրա այս ճնշումը սկսվել է ուկրաինական պատերազմի սկսվելուց հետո։ Վրաց ժողովուրդն իր իմաստությամբ աջակցեց մեզ այս ճանապարհին, որը մենք ընտրեցինք խաղաղությունը պահպանելու համար։ Այսօր մեր դիրքորոշումը հստակ է՝ Ուկրաինայում պատերազմը պետք է ավարտվի։ Պատերազմից առաջ մենք ասում էինք, որ սա կործանարար է լինելու երկրի համար, և այն պետք է դադարեցվի։ Այսօր Թրամփը նույն բանն է ասում, բայց մենք նույնն ասում ենք ոչ թե նրա դիրքորոշումը կիսելու համար, այլ որովհետև պատերազմի առաջին օրվանից ենք եղել այդ համոզմունքին։ Նրանք մեզ կոչ արեցին միանալ պատժամիջոցներին, ուղարկել կամավորներ և աջակցել պատերազմին, թեև մենք ոչ ՆԱՏՕ-ի անդամ ենք, ոչ էլ՝ Եվրամիության։ Մեր տարածքի 20 տոկոսը օկուպացված է. Իր խոստումներով Արևմուտքը մեզ մենակ թողեց միջուկային երկրի առաջ։ Եվրոպամետ երիտասարդները Ռուսաստանի հետ պատերազմելու կոչ են անում։ Մի օր պատմությունը կապացուցի, որ մենք փրկել ենք Վրաստանը»,- ընդգծել է Կավելաշվիլին։
