Սիրիայում ռազմական գործողությունները և Լիբիայում ու Ղարաբաղում տարած հաղթանակը մեզ են պատկանում. Էրդողան

Թուրքիայի նախագահ Ռեջեփ Թայիփ Էրդողան դարձյալ անդրադարձել է Արցախի օկուպացիային թուրքական մասնակցությանը։«Ե՛վ Մանազկերտի հաղթանակը, և՛ Ստամբուլի նվաճումը մերն են: Ինչպես Չանաքքալեն (Գալիպոլիի ճակատամարտում), այնպես էլ օգոստոսի 30-ը (Դումլուփընարի ճակատամարտը) մեզ են պատկանում: Թե՛ Կիպրոսի խաղաղության գործողությունը (Կիպրոսի հյուսիսի օկուպացիան), թե՛ հուլիսի 15-ի օրը (2016 թ. հեղաշրջման փորձի ձախողումը) մեր հաղթանակն են: Ե՛վ Սիրիայում ռազմական գործողությունները, և՛ Լիբիայում ու Ղարաբաղում տարած հաղթանակները մեզ են պատկանում: Մեր հաջողությունն է նաև, որ ահաբեկիչները չեն կարող շնչել մեր սահմաններից դուրս: Ինչպես մենք չենք տարբերում պատմական գործիչներին, այնպես էլ չենք տարբերում մեր հաղթանակները»,– նշել է Թուրքիայի նախագահը։