Իրանի նորընտիր նախագահն Ալիևին հղած ուղերձում հույս է հայտնել, որ «օկուպացիայի վերացմամբ» նոր հնարավորություններ կբացվեն

Իրանի նորընտիր նախագահ Իբրահիմ Ռաիսին կապերի ամրապնդման մասին հաղորդագրություն է ուղարկել Ադրբեջանի նախագահ Իլհամ Ալիևին. հաղորդում է Mehr-ը:

Ռաիսին իր ուղերձը հղել է՝ պատասխանելով Ադրբեջանի ղեկավարի շնորհավորանքներին: Դրանում նա կոչ է արել ընդլայնել Թեհրանի ու Բաքվի համագործակցությունը:

Ռաիսին ասել է, որ Ադրբեջանի և Իրանի ժողովուրդներն ունեն ընդհանուր մշակութային և պատմական արմատներ և եղբայրական հարաբերություններ: Նա նշել է, որ Թեհրանի ու Բաքվի միջև կապերի հետագա ընդլայնման ու խորացման համար մեծ ներուժ կա:

Իրանի նախագահը նաև նշել է, որ «Ադրբեջանի օկուպացված տարածքների նկատմամբ ինքնիշխանության վերադարձը և ընդհանուր սահմանների վերածնունդը» նոր հնարավորություններ կստեղծեն և կնպաստեն տարածաշրջանային խաղաղությանն ու անվտանգությանը։