Ադրբեջանական «Silk Way» բեռնատար ավիաընկերության ինքնաթիռները սկսել են թռչել Հայաստանի օդային տարածքով. հայտնում է «Sputnik Արմենիան»։
««Silk Way»–ն առավել հայտնի է որպես դեպի Ադրբեջան զենք փոխադրող ավիաընկերություն։
Օրերս «Sputnik Արմենիայի» լրագրողը Հայաստանի օդային տարածքով նման թռիչքներից մեկն արձանագրել է «Flightradar24» հարթակում։
Ինքնաթիռը Նախիջևանից Բաքու էր թռչում։ Ընդ որում, Իլ–76 ինքնաթիռը Ադրբեջանի մայրաքաղաքից Նախիջևան է հասել Վրաստանի և Թուրքիայի տարածքով։
«Sputnik Արմենիային» «Հայաէրոնավիգացիայից» հաստատել են, որ հայկական տարածքով նման թռիչք իրականացվել է։ Ավելին, այստեղից հայտնել են, որ սա առաջին չվերթը չէ` նման թռիչքներ գրանցվել են նաև 2025 թվականին՝ կապված եղանակային բարդ պայմանների հետ։
Նշենք, որ ադրբեջանական «Silk Way» ընկերությունը հաճախ օգտագործվում է Ադրբեջան զենք-զինամթերք մատակարարելու, ինչպես նաև Բաքվի և Նախիջևանի միջև ռազմական նշանակության չվերթեր իրականացնելու համար»:
