Ադրբեջանի նախագահ Իլհամ Ալիևի ընտանիքին և նրա մերձավորներին պատկանում են մեծ քանակությամբ օֆշորային ընկերություններ, որոնց մասին նախկինում անհայտ էր, հայտնում է Կոռուպցիայի և կազմակերպված հանցավորության հետազոտությունների կենտրոնը (OCCRP)՝ վկայակոչելով «Պանդորայի փաստաթղթերը»:
«OCCRP-ն հայտնաբերել է Բրիտանական Վիրջինյան կղզիներում գրանցված՝ ընդհանուր առմամբ 84 նախկինում անհայտ օֆշորային ընկերություն, որոնք 2006 թվականից պատկանում են Ալիևներին ու նրանց մերձավոր անձանց», – գրում է կենտրոնը:
Ըստ OCCRP-ի՝ Իլհամ Ալիևի որդի Հեյդարը ձեռք է բերել առաջին օֆշորային ընկերությունը դեռ դպրոցական տարիներին: Ալիևի դուստր Արզուն 19 տարեկանում դարձել է օֆշորային ընկերության սեփականատեր: Այս օֆշորային ընկերություններից մի քանիսը փակվել են վերջին տարիներին, Ալիևները վաճառել են ունեցվածքի մի մասը:
Կենտրոնը նշում է, որ 2017-ի դրությամբ Ալիևները մոտ 191 միլիոն դոլարի անշարժ գույք են փոխանցել գաղտնի հիմնադրամին, որը ստեղծվել և վերահսկվել է Ադրբեջանի նախագահի աներոջ կողմից:
