Ադրբեջանի նախագահ Իլհամ Ալիևը հինգշաբթի օրը իր ռուս գործընկեր Վլադիմիր Պուտինի հետ հեռախոսազրույց է ունեցել երկկողմ կապերի զարգացման հեռանկարների և տարածաշրջանում տիրող իրավիճակի մասին: ՏԱՍՍ-ի հաղորդմամբ՝ այս մասին հայտնում է ադրբեջանական պետության ղեկավարի մամուլի ծառայությունը:
«Ընդգծելով տարբեր բնագավառներում ադրբեջանա-ռուսական երկկողմ բարեկամական հարաբերությունների հաջող զարգացումը, պետությունների ղեկավարները վստահություն հայտնեցին համագործակցության հետագա ամրապնդման գործում, մտքեր փոխանակեցին կապերի հեռանկարների վերաբերյալ: Հեռախոսազրույցի ընթացքում քննարկվեց իրավիճակը տարածաշրջանում»,- ասվում է հայտարարության մեջ:
Ալիևը նաև շնորհավորել է Ռուսաստանի նախագահին ծննդյան օրվա առթիվ և մաղթել նոր հաջողություններ պետական գործունեության մեջ և առողջություն՝ երկրի զարգացման ու բարգավաճման համար:
