ՀՀ ՊՆ ներկայացուցիչ Արծրուն Հովհաննիսյանը հայտարարել է, որ Ադրբեջանի զինված ուժերը նախապատրաստվում են հարձակման՝ կուտակվելով Իրանի սահմանների մոտ, որպեսզի Լեռնային Ղարաբաղի Հանրապետության բանակը չկարողանա կրակել իրենց վրա, հայտնում է ՌԻԱ գործակալությունը:
Նրա խոսքերով՝ արդեն երկրորդ օրն է, որ ադրբեջանական զորքերը, չունենալով բավարար կարողություններ արդյունավետ հարձակողական գործողություններ իրականացնելու համար, սկսել են ակնհայտ սադրանքների դիմել:
Հովհաննիսյանը շեշտել է, որ Ադրբեջանի զորամասերը մեծ խմբերով են կուտակվում իրանա-ղարաբաղյան սահմանի երկայնքով (Արաքս գետի երկայնքով) և, «թաքնվելով սահմանի հետևում», փորձում են առաջ շարժվել:
Հայաստանի պաշտպանության նախարարության ներկայացուցիչը կարծում է, որ նման մարտավարության միջոցով ադրբեջանական բանակը Արցախին փորձում է հրահրել կրակ բացել կամ հարվածներ հասցնել Իրանի սահմանի ուղղությամբ:
Միաժամանակ նա կարծիք է հայտնել, որ այլընտրանքի բացակայության դեպքում ադրբեջանցի զինծառայողները կարող են նահանջել կամ փախչել Իրան:
«Դրանից խուսափելու համար մենք կարծում ենք, որ իրանական կողմը, որն անկասկած տեսնում է այս ամենը, պետք է կանխի կամ ստիպի նրանց զերծ մնալ այդպիսի կուտակումներից», ամփոփել է Արծրուն Հովհաննիսյանը:
