Այսօր Հակակոռուպցիոն դատարանում տեղի է ունեցել Սամվել Կարապետյանի խափանման միջոցը փոխելու դատական նիստը։ Իշխանությունները դատարանի տարածքում տեղակայել են մեծ թվով ոստիկանական ուժերի, որոնք սկսել են բերման ենթարկել Սամվել Կարապետյանի աջակիցներին։
«Այսօր ժամը 12-ից քննությունը սկվել է: Միջնորդությունը վերաբերում է տնային կալանքը որպես խափանման միջոց երկարաձգելուն: Հիմքերը և հիմնավորումները նույնպիսինն են կամ այն նույն բովանդակությունը ունեն, երբ ներկայացվում էր, որ կալանքը կիրառվի որպես խափանման միջոց: Նույն բառերն են, ուղղակի վերջում տնային կալանք բառն է օգտագործվում»,- Հակակոռուպցիոն դատարանի դիմաց լրագրողների հետ զրույցում ասել է Վարդևանյանը:
Նա ընդգծել է, որ Սամվել Կարապետյանի թե՛ 7 ամիս տևած կալանքը, թե՛ 2 ամիս տևած տնային կալանքը ոչ մի անհրաժեշտ հիմնավորում չունեն:
«Պարզապես խափանման միջոց նման ինտենսիվության չի կարող կիրառվել իրավաչափության սահմաններում: Այլևս այս քրեական վարույթը զուտ մի պրիմիտիվ քաղաքական հետապնդում չէ: Այս միջնորդությունը այլևս վերաբերում է Հայաստանում քաղաքական գործընթացների հավասարությանը, արդարությանը կամ դրանց խաթարմանը, որովհետև այն ժամկետը՝ 1 ամսով, որով խնդրում են, որ տնային կալանքը երկարաձգվի, ուղիղ միջամտում է քաղաքական պրոցեսներին»,- նշել փաստաբան Արամ Վարդևանյանը:
