Երեկ՝ հունվարի 17-ին, ժամը 16։00-ին «Զանգակ» գրատանը կազմակերպվեց սփյուռքահայ լրագրող և հետազոտող Ավետիս Հաջյանի հեղինակած «Գաղտնի ազգ․ Թուրքիայի ծպտյալ հայերը» (“Secret Nation: The Hidden Armenians of Turkey”) գրքի շնորհանդեսը, որին ներկա էր նաև հեղինակը։
Այդ մասին հաղորդում է Akunq.net-ը։
Աղբյուրի փոխանցմամբ՝ հեղինակը նախ լուսանկարների միջոցով ներկայացրեց գիրքը, ապա պատասխանեց ներկաների հարցերին։ 592 էջից բաղկացած սույն ուսումնասիրությունը հիմնականում հիմնված է հեղինակի դաշտային հետազոտությունների վրա։ Բովանդակությունը կազմված է՝ ըստ Արևմտյան Հայաստանի և Թուրքիայի հայաբնակ այն շրջանների, որտեղ մինչ օրս պահպանվել են արևմտահայության բեկորներ։ Առանձին ենթագլուխներով անդրադարձ կա նաև Պոնտոսի շրջանում ապրող համշենահայերին, հայ հոռոմներին և հայախոս բոշաներին։
Անգլերենով լույս տեսած սույն գիրքն առաջին անգամ էր ներկայացվում հայաստանցի ընթերցողին։ Մինչ այդ շնորհանդեսներ էին կազմակերպվել Շտուտգարդում, Լոնդոնում և Նյու Յորքում։
Գրքին առավել մանրամասն ծանոթանալու համար կարող եք ընթերցել սույն հարցազրույցը՝ https://akunq.net/am/?p=62008։
Լուսանկարները՝ Աստղիկ Օհանյանի
Մելինե Անումյան / Akunq.net
