Մեր գլխին թափվող մեգաաղմուկի մեջ չենք նկատում, թե ինչպես է փոխվում եղանակը, ինչ սքանչելի տեսարաններ է հրամցնում մեզ: Բայց այդ աղմուկի նպատակներից մեկն էլ հենց բոլորիս անհաղորդ պահելն է այս գեղեցիկ պատկերներից. Կառավարության շենքի իր տաքուկ աշխատաասենյակից տեսանյութ հրապարակելով՝ գրել է կառավարության աշխատակազմի ղեկավար Արայիկ Հարությունյանը։
Նրա գրառման տակ հասարակ մահկանացուները առաջարկել են թողնել ծառայողական մեքենան ու այսօր ավտոբուսով գնալ տուն, տեսնենք՝ կկարողանա՞ր։
Երևանում հանրային տրանսպորտը կաթվածահար է։
Ավտոբուսները չունեն ձմեռային անվադողեր, ինչի պատճառով կանգնած են մնացել տեղում. վարարոդները վթարներից խուսափելու համար հրաժարվում են վարել մեքենան՝ ուղևորներին հորդորելով ճանապարհը շարունակել ոտքով։
Մյասնիկյան պողոտայով, Կիևյան կամրջով, քաղաքի տարբեր հատվածներով մարդիկ ոտքով են գնում տուն։
Իսկ բարձր պաշտոն զբաղեցնող, ծառայողական մեքենա ունեցող, իրականությունից կտրված, իսկ մի ժամանակ պոպուլիզմ վաճառող Արայիկ Հարությունյանը, որ իշխանավարման սկզբնական տարիներին մետրո էր նստում, այսօր իր տաքուկ աշխատասենյակից հանրությանը բնությամբ զմայլվելու խորհուրդ է տալիս։
Մտեք մետրո, որտեղ սարսափելի կուտակումներ են, դուրս եկեք փողոց, որտեղ տրանսպորտը կանգնած է, ցրտին ու ձյանը կիլոմետրերով քայլեք հասարակ մահկանացուների պես, տեսնեք՝ կշարունակե՞ք զմայլվել եղանակով, Արայի՛կ Հարությունյան։
