Արդեն պարզ է, թե ինչու էր կառավարության միջանցքներում ԱԳ նախարարի կարգավիճակ ունեցողը, ձեռքը գրպանը դրած, ինքնագոհ, կիսասպառնալից, մունաթով ու հեգնանքով խոսում մեր գործընկեր լրագրողների հետ. գրել է ԱԺ «Պատիվ ունեմ» խմբակցության պատգամավոր Տիգրան Աբրահամյանը։
«Հանձնարարությունը գերազանց կատարել են, ադրբեջանական նախապայմաններն ու հոխորտանքներն ընդունել ու գոհ-գոհ ման են գալիս:
Դե մի քանի օր առաջ էլ լավ նորություններով իրենց թուրք լրագրողների հետ կիսված կլինեն, հո՞ թաքցնելու բան չունեն, հո՞ հայ հասարակությունը չի, որ վերջին պահին իմանա գլխին եկողը»,- նկատել է պատգամավորը:
24news.am-ի գլխավոր խմբագիր Նարեկ Գալստյանը ֆեյսբուքյան իր էջում տարածել է տեսանյութը՝ գրելով. «Հայաստանի արտաքին գործերի նախարար Արարատ Միրզոյանն աչքի է ընկել 24News-ի լրագրող Մերի Մանուկյանի նկատմամբ, մեղմ ասած, ոչ կոռեկտ պահվածքով։
Ի՞նչ է եղել իրականում։ Միրզոյանը սկզբունքորեն հրաժարվում է ճեպազրույցներ տալ կառավարության ու խորհրդարանի միջանցքներում՝ այն պարագայում, որ նա ու իր քաղաքական թիմն այսօր կայացնում են Հայաստանի համար ճակատագրական ու, իմ սուբյեկտիվ կարծիքով, կործանարար որոշումներ։
Կառավարության նիստից հետո Մերին խնդրում է, որպեսզի Միրզոյանը ճեպազրույց տա, ինչին հերթական անգամ բացասական պատասխան է հնչում։
Մերին, հաշվի առնելով կառավարության փողերով Հայաստան եկած ու իշխանական վերնախավի հետ ինտերվյու արած թուրք լրագրողների պատմությունը, հարցնում է, թե արդյո՞ք Միրզոյանը ինտերվյու է տալիս «միայն թուրք գործընկերներին»։ Արդեն տեսանյութում երևում է Միրզոյանի պահվածքը»։
