Եթե վերջին 10 տարին վերլուծենք, դիտվում է ձմեռային ժամանակահատվածի ջերմաստիճանի կտրուկ բարձրացում բավականին մեծ ցուցանիշով և տեղումների անկում: Այս մասին այսօր՝ մամուլի ասուլիսի ժամանակ նշեց Շրջակա միջավայրի նախարարության «Հիդրոօդերեւութաբանության և մոնիթորինգի կենտրոնի» տնօրենի տեղակալ Գագիկ Սուրենյանը:
«Բայց միևնույն ժամանակ ամառային ժամանակահատվածում ջերմաստիճանը գրեթե անփոփոխ է և դիտվում է տարվա տաք կեսին տեղումների զգալի ավելացում։ Այսինքն, եթե տարեկան կտրվածքով գնահատենք, ձմռանը տեղումները պակասում են, ամռանը ավելանում են, տարեկան կտրվածքով առանձնապես լուրջ փոփոխություններ չունենք»,-ասաց նա:
Խոսելով ապրիլի կանխատեսումների մասին, Գագիկ Սուրենյանն ասաց. «Ապրիլին պետք է ակնկալել լավ անձրևներ, եթե նորմայի մոտ մենք տեղումներ ենք կանխատեսում, իսկ ապրիլի նորմանները Հանրապետությունում հատվածներ կան, որ տեղումների քանակը հասնում է մինչև 100 միլիմետրի, որը շատ մեծ ցուցանիշ է, պետք է ակնկալենք, որ ամսվա ընթացքում մենք կունենանք նորմալ տեղումներ, որը միայն ուրախալի է»:
