ԱԺ «Պատիվ ունեմ» խմբակցության պատգամավորները հայտարարել են խորհրդարան վերադառնալու և ԱԺ-ում աշխատանքները շարունակելու մասին։ Միաժամանակ, «Պատիվ ունեմ»-ից հայտնել են, որ իրենք շարունակելու են նաև փողոցային պայքարը։
Հիշեցնենք՝ ԱԺ երկու ընդդիմադիր՝ «Հայաստան» և «Պատիվ ունեմ» խմբակցությունները գարնանից բոյկոտում են ԱԺ աշխատանքները, իսկ սեպտեմբերից, երբ մեկնարկել էր ԱԺ նստաշրջանը, նրանք հայտարարել էին խորհրդարան չվերադառնալու մասին։
«Պատիվ ունեմ» խմբակցության պատգամավոր Թագուհի Թովմասյանը տեղեկացնում է.
«Եկող շաբաթվա ԱԺ նիստերին մենք մասնակցելու ենք: Բայց դա չի նշանակում, որ Նիկոլ Փաշինյանի իշխանության դեմ պայքարը չի շարունակվելու: Փողոցում, այլ ձևաչափի պայքարի միջոցները կիրառվելու են Նիկոլ Փաշինյանի իշխանության դեմ, նրա շարունակականությունը կասեցնելու դեմ, բայց այս պահին կլինենք նաև խորհրդարանում:
Մենք խորհրդարանական լծակները մինչ այս ծառայեցրել ենք
որպես բացառապես պայքարի գործիք և մենք այդ գործիքը պատրաստվում ենք ամբողջապես օգտագործել: Մեր դիրքորոշման մեջ ոչինչ չի փոխվել։
Ես ևս մեկ անգամ վերահաստատում եմ, որ մեր ձեռքի տակ եղած ամբողջ գործիքակազմն օգտագործելու ենք այս իշխանությունների հեռացման համար:
Ազգային ժողովում լինելը և փողոցային պայքարը միմյանց չբացառող գործընթացներ են»:
