«Որոնողական աշխատանքերն ամբողջ գիշեր շարունակվել են։ Դեռևս երկու անհետ կորած ունենք, սակայն 16 զոհված քաղաքացիներից մեկի անձը չի նույնականացվել։ Եթե երկու անհետ կորածներից մեկի անձը չի նույնականացվել, ուրեմն, ունենք մեկ անհետ կորած քաղաքացի։
Մեր տեղեկությունների համաձայն՝ անհետ կորած քաղաքացին պայթյունի պահին եղել է շենքի առաջին հարկի մուտքի մոտ։ Մենք հիմա որոնողական աշխատանքներ ենք իրականացնում շինության մոտակա տարածքներում, ինչը լրացուցիչ բարդություններ է առաջացանում, որովհետեւ շենքի փլուզման վտանգ կա»,- «Սուրմալու» առևտրի կենտրոնի տարածքում լրագրողների հետ ճեպազրույցի ժամանակ ասել է ԱԻ փոխնախարար Արտյուշ Գրիգորյանը։
Փոխնախարարը տեղեկացրել է, որ Առևտրի կենտրոնի սեփականատերերը չեն մասնակցում որոնողական աշխատանքներին, սակայն կապ են պահում։
«Այս պահին իրականացվել է փլատակների մաքրման աշխատանքների 70 %-ը։ Քիչ է հավանականությունը, որ աշխատանքներն այսօր կավարտվեն, բայց չի էլ բացառվում։ Ամեն ինչ կախված է այն բանից, թե երբ կհայտնաբերենք քաղաքացիներին։ Մենք հիմա քննարկում ենք շենք մուտք գործելու հարցը, որպեսզի իրականացնենք որոնողական աշխատանքներ»,-հավելել է փոխնախարարը։
