Այսօր վարչապետ Նիկոլ Փաշինյանի հրավերով կառավարություն նրան այցի գնացած հոգևորականների թվում էր ոչ անհայտ Տեր Նավասարդ արքեպիսկոպոս Կճոյանը։ Ըստ «Հայկական ժամանակի»՝ «Վարչապետը ողջունել է ներկաներին և շնորհակալություն հայտնել նրանց հրապարակային կերպով արտահայտած սկզբունքային դիրքորոշման համար»:
Այս առումով հիշեցի համանուն թերթում 2011թ․ հրապարակված այս կարճ նյութը, որի հղումը տեղադրում եմ ստորև։ Ինչպես կասեր հայտնի ֆիլմի հերոսը՝ Կճոյանը նույն Կճոյանն է, Փաշինյանը՝ նույն Փաշինյանը, թեպետ արդեն այլ կարգավիճակում։
Սակայն մեկ տարբերություն, ամեն դեպքում կա․ եթե ըստ ՀԺ-ի խմբագիր Փաշինյանի՝ Կճոյանը «հոգևորականին ոչ վայել ճոխ կենցաղով է ապրում և նախընտրական քարոզարշավների ժամանակ համարվում է ՀՀԿ-ի ամենաեռանդուն քարոզիչներից մեկը», ապա վարչապետ Փաշինյանը Կճոյանին համարում է “հրապարակայնորեն սկզբունքային դիրքորոշում արտահայտող” հոգևորական, ընդունելության արժանացնում կառավարությունում և աղոթում նրա հետ։
Ամեն դեպքում, այս հանդիպումից մեկ բան անհայտ մնաց․ Կճոյա՞նն է այցելել կառավարություն՝ Փաշինյանին, թե՞ Կճոյանի կիսանդրին։
Նարինե Մկրտչյան, Մամուլի ազգային ակումբի նախագահ
