Կառավարությունն իր այսօրվա՝ հունիսի 9-ի նիստում որոշեց պարտադիր զինծառայությունից ազատել 5 քաղաքացու՝ Տիգրան Արշակի Գրիգորյանին, Դավիթ Արմենի Մարտիրյանին, Արման Ալեքսանդրի Ավետյանին, Խաչիկ Սուրենի Խաչատրյանին, Գրիշա Գագիկի Գասպարյանին:
Այս որոշումները պայմանավորված են նրանց գիտական գործունեության ընթացքում ձեռք բերված գիտելիքների ընդլայնմանը և նոր գիտելիքների ստացմանն ու կիրառմանն ուղղված մտավոր ստեղծագործական գործունեությունը շարունակելու հնարավորության ընձեռմանը:
Տիգրան Գրիգորյանը 2021 թվականի դեկտեմբերի 17-ին պաշտպանել է թեկնածուական ատենախոսություն՝ «Կանոնավոր արտահայտություններ՝ բազմաժապավեն վերջավոր ավտոմատների լեզուների համար» թեմայով եւ ստացել ֆիզիկամաթեմատիկական գիտությունների թեկնածուի գիտական աստիճան: Այժմ աշխատում է ԵՊՀ մաթեմատիկական և կիրառական հետազոտությունների կենտրոնի տեղեկատվական տեխնոլոգիանների և մեքենայական ուսուցման լաբորատորիայում՝ որպես կրտսեր գիտաշխատող, և կատարում է գիտական ու գիտահետազոտական աշխատանքներ:
26-ամյա Դավիթ Մարտիրյանը այս տարվա հունվարի 25-ին պաշտպանել է «J/Ѱ– ֆոտոծնման ուսումնասիրումը CLAS12 սարքավորման վրա» թեմայով ատենախոսությունը եւ ստացել ֆիզիկամաթեմաթիկական գիտությունների թեկնածուի կոչում։ Նա աշխատում է Ա․ Ի․ Ալիխանյանի անվան ազգային գիտական լաբորատորիայում՝ որպես գիտաշխատող։ Ունի հրապարակված 6 գիտական հոդված:
26-ամյա Արման Ալեքսանդրի Ավետյանը 2021 թ. դեկտեմբերին Հայ-ռուսական համալսարանում պաշտպանել է թեկնածուական ատենախոսություն «Խելացի քաղաք» հայեցակարգը և XXI դարի քաղաքային տնտեսության կառավարման ռազմավարության հիմնախնդիրները» թեմայով և ստացել տնտեսագիտության թեկնածուի գիտական աստիճան: Նա դասախոսում է Հայ-ռուսական համալսարանի Կառավարման, բիզնեսի և տուրիզմի ամբիոնում: 2019 թ. մինչ օրս աշխատում է ՀՀ ՊՆ Պաշտպանական ազգային հետազոտական համալսարանում՝ որպես գիտնական-վերլուծաբան:
Խաչիկ Սուրենի Խաչատրյանը 2022 թվականի հունվարին պաշտպանել է ատենախոսություն «Կոնային քվանտային կետերի էլեկտրոնային և օպտիկական հատկությունների ուսումնասիրումը» թեմայով եւ ստացել ֆիզիկամաթեմաթիկական գիտությունների թեկնածուի գիտական աստիճան: 2020-ից աշխատում է Հայ-ռուսական (Սլավոնական) համալսարանում՝ որպես դասախոսի ասիստենտ, իսկ 2021 թվականի սեպտեմբերից արդեն՝ մշտական հիմունքներով դասախոս:
Գրիշա Գագիկի Գասպարյանը, որպես ասպիրանտ, Էռազմուս+ փոխանակման ծրագրով 2020թ․-ի փետրվար-մայիս ամիսներին հետազոտական աշխատանք է իրականացրել Վենետիկի Կա Ֆոսկարի համալսարանում: Ներկայումս Երևանի պետական համալսարանի Անգլերենի թիվ 2 ամբիոնի դասախոս է և Հայ-ռուսական համալսարանի Հումանիտար գիտությունների ինստիտուտի Լեզվի տեսության և միջմշակութային հաղորդակցության ամբիոնի ասիստենտ, ակտիվորեն մասնակցում է հանրապետական և միջազգային գիտաժողովների և գիտական սեմինարների, տպագրում գիտական հոդվածներ, ղեկավարում կուրսային աշխատանքներ և մասնագիտական պրակտիկաներ։ Գիտական գործունեությանը զուգահեռ՝ Գ․ Գասպարյանը զբաղվում է նաև մանկավարժական գործունեությամբ։
