Առավոտյան մոտ 30 դիմակավորված անձինք ներխուժել են Շիրակի թեմի առաջնորդարան: Այս մասին հայտնել է փաստաբան Միհրան Պողոսյանը։
Իրավապահները խուզարկություն են իրականացնում Շիրակի թեմի առաջնորդարանում: Այս պահին ոստիկանները հսկում են Շիրակի թեմի առաջնորդարանի մուտքը։ Միքայել արքեպիսկոպոս Աջապահյանը ներսում չէ, նա այս պահին մասնակցում է Մայր աթոռ Սուրբ Էջմիածնում Քահանայից ժողովին։
Սրբազանի պաշտպանին թույլ չեն տվել ներս մտնել առաջնորդարան, որտեղ այս պահին խուզարկություն է կատարվում։ Իրավապահներն ասել են, որ նա կկարողանա մուտք գործել խուզարկությունից հետո։ Ոստիկանները թույլ չեն տալիս անգամ հոգևորականներին մտնել առաջնորդարան։
Հիշեցնենք, որ Շիրակի թեմի առաջնորդ Միքայել արքեպիսկոպոս Աջապահյանի նկատմամբ քրեական վարույթ է նախաձեռնվել։
«2025 թվականի հունիսի 17-ին նախաձեռնվել է քրեական վարույթ՝ Քրեական օրենսգրքի 422-րդ հոդվածի 2-րդ մասով (իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը)», – հայտնել էին գլխավոր դատախազությունից։
Շիրակի թեմի առաջնորդը հեղաշրջման մասին առաջին անգամ խոսել է 2024 թվականի փետրվարին՝ ասելով. «Ե՛վ ասել եմ՝ պետք է ռազմական հեղաշրջում, և՛ դրանից հետո էլ եմ ասել՝ պետք է ռազմական հեղաշրջում, բայց մենք բանակ չունեցանք, չունեցանք գեներալիտետ, ովքեր կանեին այդ անհրաժեշտ քայլը պետականության և Արցախի փրկության համար»: Ռազմական հեղաշրջման մասին խոսել է նաև օրեր առաջ՝ News.am-ին տված հարցազրույցում։
