Արդեն տեղեկացրել ենք, որ ՀՀ աշխատանքի և սոցիալական հարցերի նախարարության և ՄԱԿ-ի Պարենի համաշխարհային ծրագրի (ՊՀԾ) համագործակցությամբ 44,000 անապահով քաղաքացիներ, որոնք տուժել են Covid-19 համաճարակի սոցիալ-տնտեսական հետևանքներից․ հայտնում ենք, որ այս շաբաթվանից պարենային աջակցության բաշխումը մեկնարկել է։ Այս մասին տեղեկացնում է ՀՀ աշխատանքի և սոցիալական հարցերի նախարարությունը։
Սննդի չափաբաժինը նախատեսված է ընտանիքի երկու ամսվա կարիքների համար և ուղղված է Երևանի և Կոտայքի մարզի բնակիչներին։
Սննդի բաշխումն իրականացնելու են տեղական ինքնակառավարման մարմինները․ առանձնացվել է 12 տեղամաս Երևանում և 11 տեղամաս Կոտայքում:
Շահառուների շրջանակը կազմվել է՝ հիմնվելով Պարենային Անվտանգության Գնահատման արդյունքների վրա, որոնք իրականացվել են ՊՀԾ-ի կողմից 2020թ․ հուլիս և օգոստոս ամիսներին՝ Covid-19 համաճարակի ընթացքում։
Առաջնահերթությունը տրվել է ամենակարիքավոր ընտանիքներին՝ հատկապես նրանց, ովքեր ընտանիքում ունեն առնվազն 3 կամ հատուկ կարիքներ ունեցող երեխաներ, հղի կին և մինչև հինգ տարեկան երեխաներ։
Գնահատման համաձայն՝ հարցվածների ավելի քան 15%-ը նշել է, որ Covid-19-ի պատճառով սննդի կարիքներն ավելի են սրվել․ ընտանիքների մոտավորապես կեսը նշել է, որ սպառել են իրենց խնայողությունները, պարտքեր են կուտակել:
Սննդի բաշխման վերաբերյալ հետադարձ կապի, հարցումների կամ բողոքների դեպքում զանգահարել ՊՀԾ թեժ գիծ՝ 096 120 400 հեռախոսահամարով կամ գրել armenia.bfm@wfp.org էլեկտրոնային հասցեով։
