Վերլուծաբան Հակոբ Բադալյանը գրում է. «Տեղեկություն է, որ այսօր երեկոյան Մայր Աթոռում լինելու է բարձրաստիճան հոգեւորականների նիստ՝ Կաթողիկոսի գլխավորությամբ, որտեղ քննարկվելու է ստեղծված հայտնի իրավիճակը: Ասում են, որ լինելու է այդ կապակցությամբ հայտարարություն:
Այսօր մեկ այլ տեղեկություն էր, որ կառավարության դիմաց եղել է ցույց՝ ի պաշտպանություն եկեղեցու:
Կարծում եմ, որ Մայր Աթոռում քննարկման արդյունքում հայտարարությունն առնվազն պետք է ունենա մի հորդոր՝ «ի պաշտպանություն եկեղեցու ցույց անողներին», որ դադարեցնեն այդ «ցույցերը»:
Մնում էր, որ Հայաստանում «ամենօրյա ցույցերի» մանրադրամի վերածվեր նաեւ Հայ Առաքելական եկեղեցին: Ես կասկածի տակ չեմ դնում ցույց անողների, պաշտպանողների անկեղծությունը: Բայց, լավ կլինի, եթե անկեղծությունն ուղեկցվի նաեւ շրջահայացությամբ, նրբանկատությամբ, հասարակական-քաղաքական գրագիտությամբ:
ՀԱԵ հարցը ցույցեր չէ, որ պահանջում է՝ առավել եւս մի քանի տասնյակ հոգանոց ցույցեր, այլ ռազմավարական խորքային աշխատանք: Հետեւաբար, եթե բուն նպատակն իսկապես ՀԱԵ հանդեպ հոգսն է, այլ ոչ թե թեմայի վրա «հասարակական-քաղաքական մակաբուծությունը», ապա ստեղծված իրավիճակը պետք է լինի խթան ոչ թե ինչ որ բողոքի ակցիաների, այլ ՀԱԵ-հասարակություն հաղորդակցության ուղղությամբ խորքային մտորումների:
Այո, նետված է մարտահրավեր, դա ակնառու է: Բայց մոլորություն է, թե այդ մարտահրավերն ունի սիմետրիկ արդյունավետ պատասխան: Արդյունավետությունը պետք է փնտրել ասիմետրիկ եզրահանգումների եւ մշակումների մեջ»:
