ՀՀ նախագահ Վահագն Խաչատուրյանը «Սուրմալու» առեւտրի կենտրոնում պայթյունի կապակցությամբ ցավակցական ուղերձ է հղել՝ հորդորելով քաղաքացիներին ու տնտեսվարողներին խստագույնս պահպանել անվտանգության կանոնները, քանի որ ՀՀ յուրաքանչյուր քաղաքացու կյանքն ու առողջությունն անգին են։
Նրա ուղերձում, մասնավորապես, նշվում է.
«Երեւանի «Սուրմալու» առեւտրի կենտրոնում տեղի ունեցած ողբերգությունը, որը խլեց բազմաթիվ կյանքեր, ընդհանուր դժբախտություն դարձավ մեր երկրի բոլոր բնակիչների համար։
Հայաստանի Հանրապետությունում հայտարարված սգո այս օրերին՝ ի հիշատակ տեղի ունեցած ողբերգության զոհերի, խորապես ցավակցում եմ զոհվածների հարազատներին եւ կիսում կորստյան վիշտը: Շուտափույթ ապաքինում եմ մաղթում վիրավորներին ու տուժածներին։
Ցանկանում եմ նաեւ իմ եւ բոլորիս անունից շնորհակալություն հայտնել Արտակարգ իրավիճակների նախարարության եւ քաղաքապետարանի աշխատակիցներին, մեր բժիշկներին, այլ պատկան մարմինների աշխատակիցներին, Հայկական Կարմիր խաչի ընկերության ներկայացուցիչներին եւ մեր կամավորներին՝ անձնուրաց աշխատանքի համար։
Այս սարսափելի ողբերգության կապակցությամբ եւս մեկ անգամ մեր բոլոր քաղաքացիներին, տնտեսվարող սուբյեկտներին եւ իրավասու մարմիններին հորդորում եմ մշտապես լինել զգոն, խստագույնս պահպանել անվտանգության կանոնները, քանի որ Հայաստանի յուրաքանչյուր քաղաքացու կյանքն ու առողջությունն անգին են»։
