ԱԺ նախագահ Ալեն Սիմոնյանը դիմել է դատարան՝ պահանջելով ակտիվիստ Միքայել Մարգարյանից ներողություն խնդրել և վիրավորանքի համար վճարել 1 դրամ։ Գործը մակագրվել է Երևանի քաղաքացիական դատարանի դատավոր Անի Աթանեսյանին. տեղեկանում ենք «Դատալեքս»-ից։
Ըստ այդմ՝ ԱԺ նախագահը պահանջում է. «Պատասխանող Միքայել Մարգարյանին պարտավորեցնել հայցվոր Ալեն Սիմոնյանից հրապարակայնորեն ներողություն խնդրել, հայտարարության վերնագիրը շարադրել այսպես՝ «Ես՝ Միքայել Մարգարյանս, ներողություն եմ խնդրում Ալեն Սիմոնյանից», իսկ բովանդակությունը շարադրել այսպես՝ «26.03.2026թ.-ին իմ կողմից ՀՀ ազգային ժողովի մոտակայքում կատարվել են արտահայտություններ Ալեն Սիմոնյանի վերաբերյալ, ինչի համար ներողություն եմ խնդրում պարոն Սիմոնյանից»:
Պատասխանող Միքայել Մարգարյանից հօգուտ հայցվոր Ալեն Սիմոնյանի բռնագանձել 1 դրամ՝ որպես վիրավորանքի համար նախատեսված փոխհատուցում։
Պատասխանող Միքայել Մարգարյանից հօգուտ հայցվոր Ալեն Սիմոնյանի բռնագանձել ընդհանուր 506 000 դրամ դատական ծախսերի հատուցում, որից 480 000 դրամ փաստաբանի վարձատրության գումար, 26 000 դրամ պետական տուրքի գումար:
Հիշեցնենք, որ մարտի 26-ին ԱԺ-ի մոտ միջադեպ էր տեղի ունեցել Ալեն Սիմոնյանի մասնակցությամբ. Քաղաքացին հայհոյել էր Ալեն Սիմոնյանին, ինչին ԱԺ նախագահը ևս պատասխանել էր հայհոյանքով։ Ալեն Սիմոնյանը լրագրողների հետ զրույցում նշել էր, թե ԱԺ-ի մոտ տեղի ունեցած միջադեպը կազմակերպված է եղել, նաև գիտի, թե ում կողմից։
Միջադեպի առթիվ քրեական հետապնդում է հարուցվել Քրեական օրենսգրքի 297-րդ հոդվածի 2-րդ մասի 3-րդ կետով (տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելը): Միքայել Մարգարյանը ձերբակալվել էր, ապա ազատ արձակվել։
Ոստիկանությունից Քննչական ուղարկված հաղորդման համաձայն՝ Մարգարյանը «իրականացրել է խուլիգանական գործողություններ, մասնավորապես՝ հասարակության նկատմամբ բացահայտ անհարգալից և բարոյական նորմերի նկատմամբ բացահայտ արհամարհական վերաբերմունք դրսևորելով՝ հայհոյանք և անպարկեշտ արտահայտություններ է հնչեցրել»:
