Ճապոնիայի նախարարների կաբինետի գլխավոր քարտուղար և կառավարության «երկրորդ մարդը» համարվող Հիրոկաձու Մացունոն հրաժարական է տվել իշխող Լիբերալ-դեմոկրատական կուսակցության (ԼԴԿ) քաղաքական նվիրատվությունների հանգանակման հետ կապված սկանդալից հետո:
Այս մասին հայտնում է ՏԱՍՍ գործակալությունը, Մացունոն իր հրաժարականի մասին հայտարարել է մամուլի ասուլիսում։
«Ես վարչապետ Կիսիդային հայտնեցի, որ ցանկանում եմ հեռանալ նախարարների կաբինետի գլխավոր քարտուղարի պաշտոնից, որպեսզի չառաջացնեմ քաղաքականության իրականացման կասեցումներ, և հրաժարական տվեցի», – ասել է նա։
Նախարարների կաբինետում գլխավոր քարտուղարի պաշտոնն առանցքային է։ Հենց նա է համակարգում բոլոր նախարարությունների ու գերատեսչությունների գործունեությունը, ինչպես նաև օրական երկու անգամ մամուլի ասուլիսներում հանդես է գալիս կառավարության անունից։
Սկանդալի մեջ ներքաշված են ԼԴԿ-ի մի քանի խմբակցություններ, հիմնականում՝ նախկինում հանգուցյալ վարչապետ Սինձո Աբեի կողմից ղեկավարվող ամենամեծ ներկուսակցական խումբը։ Այս սկանդալի պատճառով կառավարության վարկանիշը, ըստ հարցումների, շեշտակի նվազել է՝ մինչև ռեկորդային 17,1 %-ի, ինչը «վտանգավոր նշագիծ» է համարվում:
Ավելի վաղ լիազորությունները վայր դնելու դիմումներ են ներկայացրել նաև Ճապոնիայի էկոնոմիկայի, առևտրի և արդյունաբերության նախարար Յասուտոսի Նիսիմուրան, գյուղատնտեսության գերատեսչության ղեկավար Իտիրո Միյասիտան, վարչական հարցերի նախարար Ձյունձի Սուձուկին, ինչպես նաև ԼԴԿ-ի այլ պաշտոնյաներ:
Ըստ մեղադրանքների՝ իշխող Լիբերալ-դեմոկրատական կուսակցության խոշորագույն խմբակցության գործիչները վերջին հինգ տարիների ընթացքում անձնական օգտագործման համար ապօրինաբար յուրացրել են հասարակության և բիզնեսի կողմից առնվազն 500 միլիոն իեն (ավելի քան 3,4 միլիոն դոլար) գումարի քաղաքական նվիրատվությունները:
