ԱՄՆ նախագահ Դոնալդ Թրամփը հայտարարել է, որ Իլոն Մասկը կբախվի «լուրջ հետևանքների», եթե որոշի ֆինանսավորել հանրապետական բյուջեի օրինագծին դեմ հանդես եկող դեմոկրատ թեկնածուներին. այս մասին Սպիտակ տան ղեկավարը հայտարարել է NBC News հեռուստաալիքին տված հեռախոսազրույցում։
«Եթե նա դա անի, ստիպված կլինի վճարել դրա համար։ Կլինեն շատ լուրջ հետևանքներ», – շեշտել է Թրամփը՝ հրաժարվելով մանրամասնել, թե ինչ միջոցառումների մասին է խոսքը։
Ավելի վաղ Թրամփի և Մասկի միջև հրապարակային կոնֆլիկտ էր տեղի ունեցել, որի արդյունքում X-ում և Truth Social-ում փոխադարձ մեղադրանքներ և սպառնալիքներ են հնչել։ Նախագահը նշել էր, որ չի մտադիրվում վերականգնել հարաբերությունները Մասկի հետ։
Ամերիկացի առաջնորդը նաև հավելել է, որ իրենց շփումն ավարտված է համարում։ «Ենթադրում եմ՝ այո», – ասել է Թրամփը՝ հայտարարելով, որ ապագայում Մասկի հետ կապվելու մտադրություն չունի։ «Ես չափազանց շատ այլ անելիքներ ունեմ։ Ես նրա հետ չեմ խոսելու», – հավելել է Թրամփը։
Բացի այդ, Սպիտակ տան ղեկավարը Մասկին մեղադրել է նախագահական ինստիտուտի նկատմամբ անհարգալից վերաբերմունք ցուցաբերելու մեջ։ «Նա շատ անհարգալից է վարվում։ Նախագահի գրասենյակի նկատմամբ նման վերաբերմունքը անընդունելի է», – ընդգծել է ԱՄՆ առաջնորդը։
