ԱՄՆ նախագահ Ջո Բայդենը երկրի հետախուզությունից պահանջել է 90 օրվա ընթացքում ներկայացնել կորոնավիրուսի ծագման վերջնական տարբերակը: Այս մասին ասվում է Սպիտակ տան հայտարարության մեջ:
Ամերիկացի առաջնորդի խոսքերով, նախագահի պաշտոնում իր երդմնակալությունից հետո հետախուզական հասարակությանը հանձնարարվել էր պատրաստել ամենաթարմ զեկույցը COVID-19-ի ծագման մասին, ներառյալ`արդյո՞ք այն ծագել է վարակված կենդանու հետ մարդու շփումից, թե՞ պատճառը լաբորատոր փորձարկումներն են: «Մինչ օրս ԱՄՆ հետախուզական համայնքը միավորվել է երկու հնարավոր սցենարի շուրջ, բայց վերջնական եզրակացության չի եկել այս հարցի վերաբերյալ», ասվում է հաղորդագրության մեջ:
Այս կապակցությամբ Ջո Բայդենը «խնդրել է» ԱՄՆ հետախուզությանը կրկնապատկել ջանքերը ՝ հավաքելու և վերլուծելու տվյալներ, որոնք կօգնեն վերջնական եզրակացության հանգել այս հարցի վերաբերյալ: 90 օրվա ընթացքում ԱՄՆ նախագահը պետք է տեղեկացվի աշխատանքի արդյունքների մասին:
