Իրանի միջուկային ծրագիրը կհանգեցնի սպառազինությունների մրցավազքի նոր փուլի, Իսրայելի արտգործնախարար Յաիր Լապիդի խոսքերը հայտնում է ՌԻԱ գործակալությունը:
«Մենք խոսեցինք Իրանի միջուկային ծրագրի և ամբողջ աշխարհի համար դրա վտանգի մասին … Միջուկային ծրագիրն արագ աճում է՝ առանց համապատասխան վերահսկողության: Պահանջվում է Կառավարիչների խորհրդի (ՄԱԳԱՏԷ) որոշումը», – ասել է Լապիդը Ռուսաստանի ԱԳ նախարար Սերգեյ Լավրովի հետ բանակցություններից հետո:
«Սա ամբողջ աշխարհի խնդիրն է. միջուկային Իրանը կհանգեցնի միջուկային մրցավազքի նոր փուլի, Մերձավոր Արևելքում սպառազինությունների մրցավազքի: Վերջին բանը, որ շատերը կցանկանային տեսնել, դա այն է, թե ինչպես է միջուկային զենքը հայտնվում սխալ ձեռքերում: Աշխարհը պետք է կանխի Իրանի միջուկային ներուժի ի հայտ գալը: Եթե աշխարհը չկարողանա դա անել, Իսրայելը իրեն իրավունք է վերապահում գործել: Իսրայելը թույլ չի տա, որ Իրանը դառնա միջուկային տերություն», – ասել է Լապիդը:
