Չին զինվորականները գերձայնային զենքի երկու փորձարկում են իրականացրել 2021 թվականի ամռանը, գրում է Financial Times-ը:
Հոկտեմբերի սկզբին թերթը, հղում անելով աղբյուրներին, հայտնել էր, որ ՉԺՀ-ն միջուկային զենք կրելու ունակ գերձայնային հրթիռ է փորձարկել։ Աղբյուրների համաձայն՝ հրթիռը չի հասել նպատակակետին, սակայն փորձարկումը ցույց է տվել, որ Չինաստանը «զարմանալի առաջընթաց է գրանցել գերձայնային զենքի ստեղծման գործում» և այս հարցում շատ ավելի առաջադիմել է, քան կարծում էին ամերիկացիները։
Այժմ թերթին հայտնի է դարձել, որ Չինաստանը գերձայնային զենք երկու անգամ է փորձարկել: Առաջինը տեղի է ունեցել, ըստ աղբյուրների, հուլիսի 27-ին: Ըստ ԱՄՆ հետախուզության գնահատականներին ծանոթ չորս մարդու, ՉԺՀ-ի զինված ուժերը հրթիռ են արձակել՝ Երկրի շուրջ «գերձայնային ծրագրող թռչող սարք» արձակելու համար, որը կարող է միջուկային զենք կրել:
Այնուհետև օգոստոսի 13-ին Չինաստանը գերձայնային զենքի երկրորդ փորձարկումն է անցկացրել, թերթին հայտնել են աղբյուրները։
