Իսրայելը հրաժարվել է ազատ արձակել երկու պաղեստինցի բժիշկների՝ մանկաբույժ, բժիշկ Հուսամ Աբու Սաֆիային, որը Գազայի հյուսիսում գտնվող Կամալ Ադվան հիվանդանոցի տնօրենն է։
ՀԱՄԱՍ-ի պաշտոնյան CNN-ին հայտնել է, որ Թել Ավիվը հրաժարվել է ազատ արձակել Աբու Սաֆիային։
Նույն պաշտոնյան հավելել է, որ Գազայի դաշտային հիվանդանոցների տնօրեն Մարվան Ալ Համսը նույնպես ազատ չի արձակվի։
Պաղեստինի առողջապահության նախարարության տվյալներով՝ վերջինս ձերբակալվել է հուլիսին։
Դոկտոր Աբու Սաֆիան ձերբակալվել է 2024 թվականի դեկտեմբերի 27-ին, երբ իսրայելական զորքերը ներխուժել են Քամալ Ադվան հիվանդանոց, ստիպել նրան դուրս գալ զենքի սպառնալիքով և ավերել հիվանդանոցը։
Նա Գազայի առողջապահական համակարգի աչքի ընկնող բժիշկներից է, քանի որ աշխատել է ծայրահեղ պայմաններում՝ հրաժարվելով տարհանման հրամաններից և շարունակելով բուժել վիրավոր քաղաքացիներին նույնիսկ ռմբակոծությունների ժամանակ։
Նրա փաստաբանական թիմը հայտնել է, որ մարտից ի վեր Աբու Սաֆիան չի ներկայացվել դատավորի առաջ և ենթարկվել է խիստ կալանքի պայմանների, ներառյալ՝ ֆիզիկական բռնություն, բժշկական խնամքի բացակայություն և երկարատև մեկուսացում։
Չնայած միջազգային կոչերին՝ կապված նրա առողջության վատթարացման և Գազայի առողջապահական համակարգում ունեցած կարևոր դերի հետ, Իսրայելը շարունակում է պահել նրան կալանքի տակ։
Իսրայելի բանակը պնդում է, որ Աբու Սաֆիան պահվում է որպես «կասկածյալ» և հետաքննվում է «ահաբեկչական գործունեությանը հնարավոր մասնակցության» համար։
Սեպտեմբերին «Բժիշկներ՝ հանուն մարդու իրավունքների» կազմակերպությունը հայտնել է, որ իր փաստաբաններից մեկը վերջերս այցելել է Աբու Սաֆիային Օֆեր բանտում՝ Ռամալլայի արևմուտքում, և փաստագրել նրա կալանքի պայմանները։
Կազմակերպության տվյալներով՝ Աբու Սաֆիան կորցրել է մոտ 25 կիլոգրամ, տառապում է քոսից՝ առանց համապատասխան բուժման, և նրա ընդհանուր առողջական վիճակը խիստ վատթարացել է։
Նա տեղյակ չէ իր դեմ առաջադրված մեղադրանքների մասին։
Կազմակերպությունը նշել է, որ բժիշկը ենթարկվում է բռնության, վատ վերաբերմունքի և բժշկական ստուգումների մերժման՝ չնայած սրտային հիվանդություններին և արյան բարձր ճնշմանը։
Կազմակերպության բանտարկյալների բաժնի ղեկավար Նաջի Աբբասը կոչ է արել Իսրայելին անհապաղ ազատ արձակել Աբու Սաֆիային և մյուս կալանավորված բուժաշխատողներին՝ նրանց կալանքը անվանելով «բարոյական և իրավական հանցագործություն»։
Փետրվարին իսրայելական լրատվամիջոցները հրապարակել են տեսանյութ, որտեղ Աբու Սաֆիան երևում է կալանքի մեջ՝ ձեռքերն ու ոտքերը շղթայված և տեսանելիորեն հոգնած։
Աբու Սաֆիան նաև անձնական կորուստներ է կրել պատերազմի ընթացքում։
Նրա որդին՝ Իբրահիմը, սպանվել է, երբ իսրայելական ուժերը ներխուժել են Քամալ Ադվան հիվանդանոց 2024 թվականի հոկտեմբերի 26-ին։
Մեկ ամիս անց նա ինքը վիրավորվել է հիվանդանոցի վրա իսրայելական հարձակման ժամանակ, սակայն հրաժարվել է հեռանալ և շարունակել է բուժել հիվանդներին։
