Ղազախստանի նախագահ Կասիմ-Ժոմարտ Տոկաեւը ստորագրել է մի շարք օրենքներ, որոնք ընդունվել են երկրի Սահմանադրության մեջ փոփոխություններ եւ լրացումներ կատարելու վերաբերյալ հանրաքվեից հետո։ Այս մասին հայտնում է Ղազախստանի նախագահի մամուլի ծառայությունը։
Նոր օրենքների համաձայն, կկրճատվեն նախագահի որոշ լիազորություններ՝ կապված տեղական գործադիր մարմինների եւ Բարձրագույն դատական խորհրդի հետ։ Բացի այդ, Ղազախստանի խորհրդարանի սենատում կկրճատվի, այսպես կոչված, «նախագահական քվոտան»։ Նաեւ երկրում 2023 թվականի հունվարի 1-ից կսկսի գործել Սահմանադրական դատարանը։
«Սահմանադրական բարեփոխումները նշանավորել են Ղազախստանի պատմության նոր դարաշրջանի սկիզբը։ Դա մեզ թույլ է տալիս ամրապնդել վերջին երեք տարիների քաղաքական վերափոխումները եւ ամուր հիմքեր դնել մեր պետականության հետագա ամրապնդման համար»,- նոր օրենքների ստորագրման հանրային արարողության ժամանակ ասել է Տոկաեւը։
Նախօրեին Տոկաեւը նշել էր, որ նոյեմբերի վերջին Ղազախստանում նշանակված արտահերթ նախագահական ընտրությունները երկրում քաղաքական նոր ավանդույթ կստեղծեն եւ քաղաքական նոր դարաշրջան կբացեն։ Նրա խոսքով, երկրում կա հետեւողական ժողովրդավարացման եւ հասարակական-քաղաքական համալիր վերափոխումների կուրսի անշրջելիություն։
Հունիսին Ղազախստանում հանրապետության սահմանադրության մեջ փոփոխություններ կատարելու հարցով հանրաքվե է անցկացվել։ Տոկաեւը նշել է, որ փոփոխությունները կուղղվեն «զսպումների եւ հակակշիռների համակարգի ամրապնդմանը»՝ քաղաքականության եւ տնտեսության մեջ կոռուպցիայի ու մենաշնորհների դեմ։ Պետության ղեկավարի լիազորությունները կսահմանափակվեն, իսկ խորհրդարանը երկրի քաղաքականության վրա ազդելու ավելի շատ հնարավորություններ կունենա։ Հիմնական օրենքում կատարված փոփոխություններին աջակցել է հանրաքվեին մասնակցած քաղաքացիների ավելի քան 75 տոկոսը։
News.am
