ԱՄՆ նախագահ Ջո Բայդենը չի հրաժարվում պատասխանատվությունից քաոսի ու այն ամենի համար, ինչ կատարվում է այս պահին Աֆղանստանում, և պատասխանատվություն է ստանձնում այդ երկրի հետ կապված որոշումների համար, որոնք ընդունվել են ամերիկյան կառավարության կողմից: ՏԱՍՍ-ի հաղորդմամբ, այս մասին հայտարարել է ԱՄՆ նախագահի՝ ազգային անվտանգության հարցերով օգնական Ջեյք Սալիվանը՝ Սպիտակ տանը պատասխանելով լրագրողների հարցերին:
Ըստ Սալիվանի, վարչակազմի՝ ազգային անվտանգության հարցերով պատասխանատու բոլոր պաշտոնյաները նույնպես պատասխանատվություն են ստանձնում ամբողջ իրավիճակի համար: ԱՄՆ-ը հասկանում էր, որ արմատական «Թալիբանը» կարող է վերահսկողություն հաստատել Աֆղանստանի վրա, սակայն չէր կարծում, որ դա տեղի կունենա այդքան արագ, հավելել է Սալիվանը:
