Ռուսաստանը աջակցում է Իրանին Շանհայի համագործակցության կազմակերպությունում ընդունելու ընթացակարգի մեկնարկին: Այս մասին այսօր հայտարարել է Ռուսաստանի նախագահ Վլադիմիր Պուտինը ՇՀԿ գագաթաժողովում, որին նա մասնակցել է տեսակոնֆերանսի միջոցով:
«Մենք բոլորս մեծ նշանակություն ենք տալիս ՇՀԿ-ի ու այն պետությունների միջև համագործակցության հարցերին, որոնք ձգտում են բաց և հավասար երկխոսություն հաստատել մեր կազմակերպության հետ, դիտարկում են նրա աշխատանքին միանալու հնարավորությունը», – ասել է Ռուսաստանի պետության ղեկավարը: «Այս համատեքստում Ռուսաստանը աջակցում է ՇՀԿ պետությունների ղեկավարների խորհրդի հաստատմանը ներկայացված՝ Իրանի Իսլամական Հանրապետությունը Շանհայի համագործակցության կազմակերպությունում ընդունելու ընթացակարգ սկսելու վերաբերյալ որոշմանը», – ասել է Պուտինը:
Պուտինը նշել է նաև, որ Ռուսաստանը ողջունում է ՇՀԿ-ում երկխոսության գործընկերոջ կարգավիճակի շնորհումը Եգիպտոսին, Քաթարին և Սաուդյան Արաբիային, հաղորդում է ՏԱՍՍ-ը:
