Ռուսաստանը թույլ չի տա Ամերիկայի Միացյալ Նահանգներին կամ որևէ այլ երկրի խոսել իր հետ «ուժի դիրքերից»: Այս մասին ասել է ՌԴ նախագահի մամուլի քարտուղար Դմիտրի Պեսկովը Аргументы и факты թերթին տված հարցազրույցում:
«Ոչ ոք թույլ չի տա, որ Ամերիկան Ռուսաստանի հետ խոսի ուժի դիրքերից: Դա անհնար է: Ամերիկացիները հիմա կրկնում են մանթրայի պես, ասում են՝ մենք բոլորի հետ խոսելու ենք ուժի դիրքերից: Պուտինը կամ Ռուսաստանի ղեկավարությունից որևէ մեկը թույլ չի տա ո՛չ ամերիկացիներին, ո՛չ էլ որևէ այլ երկրի մեզ հետ այդպես խոսել: Դա բացառվում է», ասել է Կրեմլի խոսնակը:
Նա դրական է պատասխանել այն հարցին, դեռ կա՞ն արդյոք ընդհանուր թեմաներ, որոնց մասին Ռուսաստանը և ԱՄՆ-ն կարող են խոսել: «Դա ռազմավարական կայունությունն է, զենքի վերահսկումը, տարածաշրջանային հակամարտությունների կարգավորումը: Այն հակամարտությունները, որտեղ Միացյալ Նահանգների դերը կարող է ինչ-որ գործնական նշանակություն ունենալ», թվարկել է Պեսկովը:
Նաև, շարունակել է նա, անհրաժեշտ է ԱՄՆ-ի հետ խոսել Իրանի միջուկային ծրագրի վերաբերյալ գործողությունների համատեղ համապարփակ ծրագրի և «աշխարհի շատ այլ խնդրահարույց իրավիճակների» շուրջ:
