ԱՄՆ պաշտպանության նախարարությունը կարծում է, որ ամերիկյան բանակը պետք է պատրաստ լինի Քաբուլի օդանավակայանին սպառնացող հավանական նոր վտանգներին: Այդ մասին հայտարարել է Պենտագոնի խոսնակ Ջոն Քիրբին մամուլի ճեպազրույցի ժամանակ, հայտնում է ՏԱՍՍ-ը:
«Մենք աշխատում ենք՝ ենթադրելով, որ պետք է պատրաստ լինենք ապագա հավանական սպառնալիքներին», – ասել է Քիրբին: Նա օրինակ է բերել ԱՄՆ զինված ուժերի իրականացրած օդից հարվածը պայթուցիկով մեքենայի վրա, որի միջոցով «Խորասանում Իսլամական պետության» գրոհայինները մտադիր էին ահաբեկչություն իրականացնել:
«Սա հատկապես վտանգավոր պահ է, – ավելացրել է ԱՄՆ պաշտպանության նախարարության ներկայացուցիչը: – Սպառնալիքները դեռ իրական են: Մենք դրան շատ լուրջ ենք վերաբերվում և կշարունակենք դա անել մինչև [տարհանումը] ավարտվի»:
