Մոսկվայում մասնակի զորահավաքը իրականացվել է. հավաստիացնում է քաղաքի զինկոմ, գնդապետ Մաքսիմ Լոկտևը։
«ՌԴ Նախագահ Պուտինի և Պաշտպանության նախարարի հրամանի հիման վրա առաջադրանքը կատարվել է լիարժեքորեն»,- նշել է նա։
«Ռիա Նովոստին» հայտնում է, որ Լոկտևը հավելել է՝ զինկոմիսարիատները դեռ շարունակում են հատուկ մարտական գործողություններին մասնակցել ցանկացող կամավորներից դիմումներ ստանալ։
Զորահավաքի ավարտի մասին ավելի վաղ հայտնել էր Մոսկվայի քաղաքապետ Սերգեյ Սոբյանինը։ Նա ընդգծել է, որ մոբիլիզացիայի կետերը փակվում են ժամը 14։00-ին, իսկ զորահավաքի ծանուցագրերն այդ պահից սկսած՝ արդեն իսկ չեն գործի։
Հիշեցնենք, որ Վլադիմիր Պուտինը մասնակի զորահավաքի մասին հայտարարել էր սեպտեմբերի 21-ին։ ՌԴ Պաշտպանության նախարար Սերգեյ Շոյգուի խոսքով՝ զորահավաքն անհրաժեշտ էր պահեստազորում 300 հազար մարդ ունենալու համար. նախ և առաջ ծառայության համար անհրաժեշտ էին զինված ուժերի կազմում ռազմական կոնկրետ մասնագիտացումներ և համապատասխան փորձ ունեցող քաղաքացիները։
