ԱՄՆ նախագահ Դոնալդ Թրամփի կաբինետի անդամները քննարկում են նրան իշխանությունից հեռացնելու և պետության ղեկավարի լիազորությունները Մայք Փենսին փոխանցելու հնարավորությունը այն բանից հետո, երբ չորեքշաբթի ամերիկացի առաջնորդի կողմնակիցները ներխուժեցին Կոնգրես: Այս մասին հայտնել է CBS հեռուստաալիքը՝ վկայակոչելով իր աղբյուրները:
Նրանց խոսքով՝ ԱՄՆ կառավարության անդամները քննարկում են նման հնարավորությունը, բայց դեռ իրենց առաջարկները չեն ներկայացրել Փենսին: Խոսքը կառավարության մի շարք անդամների՝ ԱՄՆ Սահմանադրության 25-րդ փոփոխությունն օգտագործելու մտադրության մասին է: Համաձայն այդ փոփոխության՝ փոխնախագահը զբաղեցնում է պետության ղեկավարի պաշտոնը նախագահի լիազորությունների վաղաժամկետ դադարեցման, նրա անգործունակության դեպքում: Բացի այդ՝ փոփոխությունը սահմանում է ամերիկյան առաջնորդի ժամանակավոր անաշխատունակության հաստատման կարգը, որի համաձայն՝ փոխնախագահը սկսում է հանդես գալ որպես Սպիտակ տան ղեկավար:
Ըստ USA Today թերթի՝ այս փոփոխությունը երբևէ չի կիրառվել, թեև ընդունվել է մոտ կես դար առաջ: Չորեքշաբթի Կոնգրեսում տեղի ունեցած դեպքերից հետո մի քանի օրենսդիրներ կոչ են արել ակտիվացնել փոփոխությունը:
Թրամփի պաշտոնավարման ժամկետը լրանում է հունվարի 20-ին, երբ Ջո Բայդենը պաշտոնապես կստանձնի նախագահի պաշտոնը:
Yerkir.am
