Եվրամիության կողմից Իսլամական հեղափոխության պահապանների կորպուսը (ԻՀՊԿ) ահաբեկչական կազմակերպություն ճանաչելը ռազմավարական սխալ է. Ստամբուլում իր թուրք գործընկեր Հաքան Ֆիդանի հետ համատեղ մամուլի ասուլիսում հայտարարել է Իրանի արտգործնախարար Աբբաս Արաղչին։
Իրանի արտաքին գործերի նախարարը նշել է, որ հենց ԻՀՊԿ-ն է «պաշտպանել Եվրոպան ԴԱԻՇ-ի սպառնալիքից»։
Նրա խոսքով՝ Եվրամիությունը լուրջ ռազմավարական սխալ է թույլ տվել. «Եվրոպան լուրջ ռազմավարական սխալներ է թույլ տվել։ Մենք դրան հիասթափությամբ ենք վերաբերվում։ Եվրոպան լուրջ ռազմավարական սխալներ է թույլ տվել ինչպես իր սեփական հաշվարկներում, այնպես էլ այլ հարցերում։ Ցավոք, Եվրամիությունը աստիճանաբար անկում է ապրում և կորցրել է իր դերն ու ազդեցությունը միջազգային ասպարեզում։ Ես նույնիսկ կարծում եմ, որ ԵՄ-ն այլևս ի վիճակի չէ ճիշտ գնահատել իր սեփական շահերը։ Ո՞վ կպայքարեր ԴԱԻՇ-ի և այլ ահաբեկչական խմբավորումների դեմ, եթե չլիներ Իսլամական հեղափոխության պահապանների կորպուսը։ Նրանք հիմա կսպառնային Եվրոպային։ Եվրոպայի անվտանգության համար կատարված աշխատանքի նշանակությունը, ցավոք, պատշաճ կերպով չի գնահատվում», – ընդգծեց Աբբաս Արաղչին։
Նշենք, որ Եվրամիությունը երեկ ԻՀՊԿ-ն ճանաչեց որպես ահաբեկչական կազամակերպություն։
