Իսրայելի վարչապետ Բենիամին Նեթանյահուն պաղեստինցիներին առաջարկել է սեփական պետությունը ստեղծել ոչ թե իրենց հայրենիքում, այլ Սաուդյան Արաբիայում։ Այս մասին նա ասել է հինգշաբթի օրը իսրայելական 14-րդ հեռուստաալիքին տված հարցազրույցում, գրում է Middle East Eye-ը:
Եգիպտոսը խստորեն քննադատել է Իսրայելի վարչապետի մեկնաբանությունները, որոնցում նա առաջարկում էր, որ Սաուդյան Արաբիայի տարածքում պաղեստինյան պետություն կարող է ստեղծվել:
Հինգշաբթի Բենիամին Նեթանյահուն Իսրայելի 14-րդ ալիքին տված հարցազրույցի ժամանակ ասաց . «Սաուդցիները կարող են Սաուդյան Արաբիայում պաղեստինյան պետություն ստեղծել, նրանք այնտեղ շատ հողեր ունեն»:
Առանց Նեթանյահուի անունը տալու՝ Կահիրեի արտաքին գործերի նախարարությունը շաբաթ օրը հայտարարել է, որ դատապարտում է այդ արտահայտությունները «ամենախիստ բառերով»:
«Եգիպտոսը դատապարտում է Իսրայելի անպատասխանատու հայտարարությունները, որոնք սադրում են թագավորության դեմ և կոչ են անում Սաուդյան Արաբիայի հողերում Պաղեստինի պետություն ստեղծել», – ասվում է գերատեսչության հայտարարության մեջ։
